OMAR MEN TUR KÚMBEZІ
Omar men Tur kúmbezi HІH ǵasyrdaǵy sáýlet eskertkishi. Atyraý oblysy Beıneý aýylynan shyǵysqa qaraı 20 shaqyrym jerde ornalasqan. O
Omar men Tur kúmbezi 1897 jyly jergilikti tastan turǵyzylǵan. Omar men Tur kúmbezi sharshylanyp salynǵan, jalpy kólemi 6,15h5,70 metr, bıiktigi 8,21 metr. Sáýletshileri - aǵaıyndy Ómir men Dúısen Qarajúsipuldary. Eskertkishtiń jalpy qurylymy tsılındrli pishindi moıyndyqqa qondyrylǵan dýlyǵa ispetti kúmbezden quralady. Kúmbez jáne moıyndyq eskertkishtiń uzyna boıylyq kóldeneń biligin ustap turatyn tórt sándik elementter arqyly biriktirilgen. Qabyrǵalary taıyz oıyndy qýystarmen naqyshtalyp, úsh jaǵynan sándik taqta ornatylǵan. Bul qurylys aldyńǵy betindegi negizgi peshtaqpen úndestik tapqan.
Omar men Tur kúmbeziniń ishi syrtqy sáýlettik sheshimge saı naqyshtalǵan. Betine qashap oıý-órnekter, túrli sýretter (qarý-jaraqtar, etik, kebis, kebeje, aqquman, samaýyr, tostaǵan, kese, dastarqan, taǵy basqalar) salynyp, ár tústi boıaýlarmen syrlanǵan.
Derek kózi:
Qazaqstan ulttyq entsıklopedııasy, 7 tom.
