Omar Abdel Salam: Beıbarys sultannyń soǵysta qoldanatyn erekshe ádisterin áli de zertteý kerek
Taıaý Shyǵys eliniń tarıhshysy jalpy ıslam órkenıeti, ıslam tarıhy týraly 150-ge tarta kitap jazǵan.
«Eńbekterimniń negizgi taqyryby ıslam álemi jaıly. Sonyń ishinde apat aldynda turǵan kúlli musylman álemin kúıreýden qutqarǵan mámlúkter jaıly da zertteýlerim bar. Jalpy mámlúkter ıslam dininiń damýyna tyń serpin berse, ondaǵy negizgi jetistik Sultan Beıbarys tusynda boldy dep aıtýǵa bolady. Sondaı kitaptyń birinde Sultan Beıbarystyń Taıaý-Shyǵystaǵy áreketteri men ıslam áleminde orny týraly baıandalady. Sultan Beıbarys búgin qaıta ashylyp jatqan áz-Zahır meshitin salýǵa yqpal etken kúlli ıslam órkenıetindegi iri tulǵa. Onyń, jalpy mámlúkterdiń Lıvan jerinde qalǵan, saqtalǵan murasy mol. Sultannyń búkil áreketi musylman elderin kresshiler men basqa da basqynshylardan qorǵap, ıslam dinin órkendetýge baǵyttalǵan», – dedi ǵalym jýrnalısterge bergen suhbatynda.
Onyń aıtýynsha, Mysyr bıleýshisi basqynshylarǵa qarsy soǵysta erekshe taktıka qoldanyp otyrǵan. Tipti Beıbarys sultannyń basqynshylarmen betpe-bet soǵysqa túspeı, jaýdyń osal tusyn dál taýyp, soqqy jasaıtyn erekshe ádisteri bolǵan.
«Sultan Beıbarys Mysyrdaǵy jasyryn joldardy jaqsy bilgen. Máselen, Mysyr jerin krestshilerden azat etkende sol jasyryn joldardy paıdalanǵan. Olardyń bekinisterin buzyp kirip, tikeleı shabýylǵa kóshkennen góri jergilikti jerdiń yńǵaıyna júgingen. Ol birneshe shaıqasty solaı jeńgen bolatyn. Osy ádis aılalarynyń bárin zertteý kerek», – dedi Omar Abdel Salam.
Eske sala keteıik, Beıbarys Sultannyń 800 jyldyǵy aıasynda búgin Mysyr eliniń astanasy Kaır qalasynda restavratsııadan keıingi meshit ashyldy. Budan bólek, Kaırdegi ál-Azhar ýnıversıtetiniń akademııasynda halyqaralyq konferentsııa ótken bolatyn. Mereıtoı jyly aıasynda baba rýhyn ulyqtaıtyn is-sharalar áli de jalǵasady.
