Omanǵa «Shahın» daýyly tóndi
Oman aqparat agenttiginiń málimetteri boıynsha, daýyl oshaǵy jaǵalaýdan 120 km qashyqtyqta jatyr. Al onyń dıametri 11-den 14 km aralyǵynda. Daýyldyń oshaǵy qurǵaq aımaqqa búgin saǵat 18:00 men 21:00 aralyǵynda jetedi.
«Maskat provıntsııasyna ortasha jáne nóser jaýyn jaýýy múmkin. Bul rette nóser jaýyn Ońtústik jáne Soltústik El-Batına provıntsııalaryna kóp jaýady jáne osy aımaqta jel de kúshti bolaıyn dep tur», -dep málimdedi Oman Azamattyq avıatsııa basqarmasynyń meteorology Mýhammad bın Alı al-Mashaıhı.
Onyń sózinshe, Azamattyq avıatsııa basqarmasynyń monıtorıng stantsııalarynda tirkelgen jeldiń jyldamdyǵy saǵatyna 55 km-di qurap otyr, al ekpini saǵatyna 75 km-ge jetedi.
Qazirgi tańda Oman astanasyndaǵy áýejaıda barlyq reıster toqtatyldy. Jaýyn saldarynan sýdyń tereńdigi 200-den 500 mm-ge deıin aralyqta bolady dep kútilýde. Óz kezeginde ol sý tasqynyna sebepshi bolýy múmkin. Kúnniń buzylýyna baılanysty eskertý de jarııalandy. Sýdaǵy tolqyndardyń bıiktigi qazirgi tańda 8-12 metrge jetýi múmkin. Oman bıligi turǵyndardy jedel túrde úkimet daıyndaǵan arnaıy oryndarǵa barýǵa shaqyrdy.
Qazaqstannyń Omandaǵy elshiliginiń ókilderi osy oqıǵanyń saldarynan zardap shekkenderiń arasynda qazaqstandyqtardyń joq ekenin málimdedi.
«Ókinishke qaraı, qazirgi tańda «Shahın» daýyly saldarynan mert bolǵandar men joǵalyp ketkender týraly málimetter kelip jatyr. Elshiliktiń habarlaýynsha, zardap shekkender men joǵalǵandardyń arasynda Qazaqstan azamattary joq. Elshilik ókilderi Omanda júrgen Qazaqstan azamattaryn qaýipsizdik talaptaryn qatań ustanyp, sultandyq bıliginiń keńesin tyńdaýǵa shaqyrdy»,-dep habarlady Qazaqstannyń dıplomatııalyq ókildigi.
Qazaqstan elshiliginiń konsýldyq esebi boıynsha Omanda shamamen elimizdiń 70 azamaty bar. Elshilik sonymen qatar jedel qyzmet telefondarynyń nómirin jarııalady. Omandaǵy Qazaqstan azamattary tótenshe jaǵdaı týyndaǵanda osy telefon nómirlerine habarlasýy kerek.
Osy kezde Oman astanasynyń kóptegen kóshelerin sý basqan. Osyǵan baılanysty turǵyndardyń qımyl-qozǵalysy qıyn bolyp tur.
Reseılik TASS agentiginiń habarlaýynsha, daýyl kele jatqany týraly habar Oman, Birikken Arab Ámirlikteri men Saýd Arabııasyna senbi kúni jetken.
Omanda jeksenbi men dúısenbi memlekettik jáne jeke sektorda resmı túrde demalys bolyp jarııalandy.
Tsıklon birneshe kúnde úndi jaǵalaýlaryna jaqyn jerden Arab teńiziniń soltústik akvatorııasyna qaraı qalyptasyp, Parsy shyǵanaǵyna jaqyndaǵan tusta kúsh ala bastady. Tabıǵattyń mundaı qubylysy meteobaqylaý tarıhynda alǵash ret tirkelip otyr. Ol osy ýaqytta Iran aýmaǵynan ótti, onda joǵalyp ketkender men zardap shekkenderdiń bar ekeni habarlandy.
Foto: AFP
