Omandy Qazaqstannyń arab álemindegi ýaqyt tezinen ótken ári senimdi seriktesi sanaımyz- Prezıdent
ASTANA. KAZINFORM - Qasym-Jomart Toqaev pen Haısam ben Tarıq Ál Saıd Táýelsizdik saraıynda keńeıtilgen quramda kelissóz júrgizdi.
Kelissóz barysynda Memleket basshysy Oman Sultanyna iltıpat tanytyp, onyń Sultan retinde Ortalyq Azııaǵa alǵash ret saparmen kelgenin atap ótti.
– Omandy Qazaqstannyń arab álemindegi ýaqyt tezinen ótken ári senimdi seriktesi sanaımyz. Kelesi jyly aıtýly data – Qazaqstan men Oman arasyndaǵy dıplomatııalyq qarym-qatynastyń ornaǵanyna 35 jyl tolýyn zor maqtanyshpen atap ótemiz. Osy ýaqyt ishinde tatý dostyqqa, ózara qurmet pen qoldaýǵa negizdelgen seriktestiktiń jańa kezeńi úshin berik irgetas qalandy. Jaqynda Oman Premer-mınıstriniń ekonomıkalyq máseleler jónindegi orynbasary Zııazın ben Haısam Ál Saıd bastaǵan joǵary deńgeıdegi delegatsııanyń Astanaǵa jasaǵan jemisti sapary memleketter arasyndaǵy qarym-qatynastyń jandana túskenin aıqyn kórsetedi, – dedi Qazaqstan Prezıdenti.
Memleket basshysy qol jetkizgen ýaǵdalastyqtar baýyrlas halyqtarǵa aıtarlyqtaı paıda ákelip, strategııalyq seriktestikti jańa deńgeıge kóterýge yqpal etetinine senim bildirdi.
– Kelissózder qorytyndysy boıynsha ekonomıkalyq yntymaqtastyqtyń túrli baǵyttaryn, sonyń ishinde energetıka, kólik-logıstıka, aýyl sharýashylyǵy, aqparattyq tehnologııalar, tsıfrlandyrý, densaýlyq saqtaý jáne basqa da salalardy qamtıtyn ekijaqty kelisimderge qol qoıamyz. Budan bólek, seriktestigimizdiń basym baǵyttaryn belgileıtin Birlesken málimdeme qabyldaımyz, – dedi Qasym-Jomart Toqaev.
Prezıdent ortaq jobalardyń iske asyrylýyn oń baǵalady. Olardyń qatarynda «Dońǵa» munaı ken ornyn ıgerý, Solidcore Resources kompanııasynyń Pavlodar jáne Soltústik Qazaqstan oblystaryndaǵy kásiporyndary, Oman Investment Authority birlesken ınvestıtsııalyq qory, sondaı-aq qonaq úı jáne shıpajaı ınfraqurylymyn damytý jobalary bar.
