Omanda sý tasqyny saldarynan zardap shekkenderdiń sany artty

ASTANA. KAZINFORM – Omanda sý tasqyny caldarynan qaza tapqandar sany 4 adamǵa jetti, olardyń úsheýi – balalar. Arab sultanatynda dúısenbi kúni tolassyz jaýǵan jańbyr birneshe kún boıy jalǵasyp, sý tasqynyna ákeldi. Ózender arnasynan tasyp, negizgi joldardy sý basty, ondaǵan kent syrtqy álemnen ajyrap qaldy, dep habarlaıdy Euronews.

Aqyry júrgizýshiler birinen soń biri sý torynan shyǵa bastady. Oman polıtsııasynyń kómegimen olar qatty jańbyr men burshaq kezinde apat aımaǵynan shyǵyp ketti.

Biraq bári birdeı sátti bola qoıǵan joq. Kem degende 100 adamdy kólikterinen djıp pen qaıyqtardyń kómegimen evakýatsııalaýǵa týra keldi. 

Oman bıligi otandastaryn úılerinen shyqpaýyn surady. Elde dúısenbi demalys kúni dep jarııalanyp, mektepter men keńseler jabyldy. 

Daýyl apta ortasynda basylǵanymen, el astanasy Maskattaǵy álemge áıgili Mýtrah Soýk bazary sársenbide áli de sý astynda qalyp turdy.