Oman: jeksenbide Iran men AQSh kelissózi bolmaıdy

ASTANA. KAZINFORM - Iran-AQSh kelissózderine deldal bolyp júrgen Oman Syrtqy ister mınıstri Badr ál-Býsaıdı jeksenbi kúni Maskatta ótýi josparlanǵan kelissóz ótpeıtinin rastady, dep habarlaıdy VVS.

- Dıplomatııa men dıalog uzaq ýaqytqa sozylǵan beıbitshiliktiń jalǵyz joly bolyp qala beredi, - dep atap ótti mınıstr H jelisindegi jazbasynda.

Buǵan deıin Iran Syrtqy ister mınıstri Abbas Arakchı Izraılmen áskerı qaqtyǵys jaǵdaıynda AQSh-pen kelissózderdi aqtaý múmkin emes dep málimdedi.

AQSh ákimshiliginiń joǵary laýazymdy ókili BBC tilshisi Tom Beıtmanǵa Iran-AQSh janama kelissózderiniń kezekti raýndynyń toqtatylýy týraly túsinikteme berdi.

- Jeksenbi kúni kezdesý bolmaıtynyna qaramastan biz kelissózderge berikpiz jáne ırandyqtar jaqyn arada kelissóz ústeline oralady dep úmittenemiz, - dedi ol.

Eske sala keteıik, juma, 13 maýsymǵa qaraǵan túni Izraıl Iranǵa jappaı soqqy berdi. Buǵan jaýap retinde Tegeran Izraılge qaraı júzden astam dron ushyrdy. Iran Natanzedegi ıadrolyq qondyrǵynyń zaqymdanǵanyn rastady, biraq radıatsııanyń taralýyn joqqa shyǵardy.

Iran Izraılge zymyran soqqylarynyń jańa tolqynyn bastady. Izraıldiń Tótenshe jaǵdaılar qyzmeti habarlaǵandaı, ırandyq zymyran atysynan eki adam qaza tapty – shamamen 60 jastaǵy áıel jáne 45 jastaǵy er adam. Taǵy 19 adam jaraqat aldy, dep habarlady Izraıldiń jedel járdem qyzmeti.

Irannyń BUU-daǵy ókili Izraıldiń áýe shabýyly saldarynan 78 adamnyń qaza tapqanyn aıtqan bolatyn. Iranda 320-dan astam adam jaraqat aldy.

Buǵan deıin Iran joǵary shendi áskerı qolbasshylar men jetekshi ǵalymdardyń Izraıl soqqysy saldarynan qaza tapqanyn rastady.

Iran Izraıl shabýylynan keıin Ormýz buǵazyn jabaıyn dep jatyr.