Oman Sultany Qazaqstannyń jasandy ıntelekt salasyndaǵy jetistikterine qyzyǵýshylyq tanytty
ASTANA. KAZINFORM — Oman Qazaqstanmen kóptegen salada aýqymdy ınvestıtsııalyq jáne seriktestik múmkindikterin kórip otyr. Bul týraly Táýelsizdik saraıynda Prezıdent Qasym-Jomart Toqaevpen keńeıtilgen quramda kelissóz ótkizgen Oman Sultany Haısam ben Tarıq Ál Saıd aıtty.
— Oman memleketi Qazaqstanmen aradaǵy qarym-qatynasqa aıryqsha mán beredi. 1992 jyly dıplomatııalyq qatynastar ornaǵan kezden bastap elderimiz dostyqqa, ózara syılastyqqa jáne syndarly ózara is-qımylǵa degen ortaq umtylysqa negizdelgen berik baılanys ornatty. Búgin bizde osy myqty irgetasqa súıene otyryp, anaǵurlym strategııalyq ári naqty nátıjege baǵyttalǵan áriptestikke qadam basýǵa tamasha múmkindik bar, — dedi mártebeli meıman.
Oman Sultanynyń aıtýynsha, joǵary deńgeıdegi ózara saparlar, Oman-Qazaqstan birlesken komıssııasynyń jumysy jáne 2025–2026 jyldarǵa arnalǵan «Jol kartasyn» júzege asyrý yntymaqtastyqtyń aýqymdy salalaryn ilgeriletý úshin senimdi negiz qalady.
— Alǵa ilgerileý barysynda ekonomıkalyq jáne ınvestıtsııalyq yntymaqtastyq osy jańa kezeńniń basty aıqyndaýshy ereksheligi bolyp qalýy tıis. Bul baılanystardy nyǵaıtý arqyly biz ózara tıimdilik pen uzaqmerzimdi seriktestik úshin jańa múmkindikterge jol asha alamyz. Oman Qazaqstanmen kóptegen salada aýqymdy ınvestıtsııalyq jáne seriktestik múmkindikterin kórip otyr. Onyń ishinde energetıka jáne taý-ken ónerkásibi, aýyl sharýashylyǵy men azyq-túlik qaýipsizdigi, kólik jáne logıstıka, qarjylyq qyzmetter, týrızm, tehnologııalar jáne jasandy ıntellekt salalary bar. Biz memlekettik ınvestıtsııalyq qorlarymyzdy, jeke sektordy jáne beıindi memlekettik qurylymdarymyzdy biriktiretin birlesken jobalardy damytýdy quptaımyz, — dedi ol.
Mártebeli meıman Qazaqstan Azııa men Eýropany jalǵaıtyn jahandyq saýda dálizderiniń boıynda strategııalyq geografııalyq orynǵa ıe ekenin, al Oman Parsy shyǵanaǵy, Úndi muhıty, Azııa jáne Afrıka aımaǵyndaǵy negizgi naryqtarǵa tikeleı teńiz qatynasyn qamtamasyz etetinin aıtty.
— Osy bir-birin tolyqtyratyn artyqshylyqtardy paıdalaný eki el úshin de ekonomıkalyq ósimge jol ashyp, qosymsha zor qundylyq qalyptastyrýǵa múmkindik beredi. Sondyqtan biz kólik jáne logıstıka salasyndaǵy, sonyń ishinde Oman porttary arqyly saýda dálizderin qurý, sondaı-aq eki el arasyndaǵy áýe qatynasyn keńeıtý boıynsha yntymaqtastyqty ilgeriletýge nıettimiz. Bolashaqqa kóz júgirtsek, qarjy sektory da áriptestikti tereńdetý úshin zor áleýetke ıe. Omanda «Oman halyqaralyq qarjy ortalyǵy» qurylyp jatqan tusta, biz tájirıbe almasý jáne ınstıtýtsıonaldyq seriktestikti damytý úshin mol múmkindikterdi kórip otyrmyz. Dál sol sııaqty, Qazaqstannyń tsıfrlyq transformatsııa jáne jasandy ıntellekt salasyndaǵy jetistikteri bolashaq yntymaqtastyǵymyzdyń mańyzdy ózegi bola alady, — dedi Haısam ben Tarıq Ál Saıd.
Buǵan deıin Prezıdent Qasym-Jomart Toqaev pen Oman Sultany Haısam ben Tarıq Ál Saıd shaǵyn quramda kelissóz júrgizdi.
