Oman Sultany Qazaqstanǵa alǵashqy saparynda «Altyn Qyran» ordenimen marapattaldy

Prezıdent Oman Sultanynyń sapary tarıhı sıpatqa ıe ekenin tilge tıek etip, onyń ekijaqty baılanystarǵa shyn máninde serpin beretinin aıtty.

— Oman — Qazaqstannyń arab álemindegi strategııalyq turǵydan mańyzdy ári ýaqyt tezinen ótken senimdi seriktesi. Yntymaqtastyǵymyz otyz jyldan beri ózara senim, túsinistik pen qoldaý rýhynda órbip keledi. Búgin Sizben Astana tórinde júzdesip, qarym-qatynasymyzdy eleýli tarıhı deńgeıge kótergeli jatyrmyz. Bul — Oman Sultanynyń Qazaqstanǵa jáne Ortalyq Azııaǵa jasaǵan alǵashqy memlekettik sapary. Sondyqtan muny elimizge kórsetken erekshe syı-qurmetińiz, sondaı-aq qos taraptyń saýda-sattyq pen ózara múddege saı keletin barlyq salada yntymaqtastyqty nyǵaıtýǵa nıetti ekenin bildiretin nyshan dep bilemin. Dástúrli munaı men gaz sektoryn nemese kólik, logıstıka, tsıfrlandyrý, jasandy ıntellekt sııaqty jańa baǵyttardy, sonymen qatar saýda baılanystary men aýyl sharýashylyǵy ónimderin jolǵa qoıý múmkindikteri jóninde ózara aqparat almasýdy osyndaı mańyzdy salalardyń qataryna jatqyzýǵa bolady. Oman sııaqty strategııalyq seriktesimiz bolǵanyna qýanamyz. Biz de elińizdiń senimdi áriptesi bolýǵa barynsha kúsh salamyz, — dedi Qasym-Jomart Toqaev.

Memleket basshysy ekijaqty qarym-qatynasty nyǵaıtýǵa Sultan Haısam ben Tarıq Ál Saıdtiń árdaıym yqylasty ekenin atap ótti. 

— Asa Mártebeli Sultan, Siz aıtýly memleket qaıratkerisiz. El basqarý isindegi kóregen ustanymyńyz ben uzaq jyldardan beri halqyńyzǵa jasap kele jatqan qaltqysyz qyzmetińiz zor qurmetke laıyq. Qazaqstan halqy Sizdi erekshe qadirleıdi, sonymen qatar Omandy seriktes qana emes, dostas ári baýyrlas el dep ataı alatynyn maqtan tutady. Sizder strategııalyq maqsat qoıý arqyly memleketti gúldendirip, damýdyń dańǵyl jolyna túsirýge bolatynyn dáleldedińizder. Ony adam kapıtalyna ınvestıtsııa quıý, ınnovatsııalardy ıgerý jáne keleshekke baǵdarlanǵan ekonomıka qurý qadamdarynan baıqaýǵa bolady. Oman Vision 2040 baǵdarlamasy ulttyq bolmys-bitimdi, eldiń qundylyqtary men dástúrlerin saqtaı otyryp, ártaraptandyrylǵan, básekege qabiletti jáne ornyqty ekonomıka qalyptastyrý jolyndaǵy strategııalyq baǵdaryńyzdyń durys ekenin kórsetedi. Kósheli kóshbasshy, beıbitshilik saqshysy ári parasatty tulǵa retinde Siz dúnıe júzindegi kóptegen jandy, tanymal saıasatkerlerdi tánti etip kelesiz, — dedi Qasym-Jomart Toqaev.

Prezıdent Omannyń aımaqtaǵy turaqtylyqty nyǵaıtý, dinaralyq dıalogty órbitý jáne gýmanıtarlyq bastamalardy iske asyrý isindegi róline toqtaldy.

— Túrli taraptar arasyna dáneker bolyp, ózara túsinisýine talaı márte yqpal ettińiz. Osy alǵyrlyǵyńyz Omandy óńirlik jáne halyqaralyq qatynastarda salmaǵy bar elge aınaldyrdy. Biz bul ustanymdy joǵary baǵalaımyz. Elińiz shyn máninde ádil ári eshkimge bura tartpaıtyn beıtarap mámileger sanalady. Sizdiń tarıhı saparyńyz Qazaqstan men Oman arasyndaǵy ekijaqty qatynastar jylnamasynda mańyzdy kezeń retinde jazylady. Asa mártebeli Sultan, halyqtarymyz arasyndaǵy dostyqty nyǵaıtýǵa qosqan ólsheýsiz úlesińizdi eskerip, Sizge «Altyn Qyran» ordenin tabystaý — men úshin zor mártebe, — dedi Memleket basshysy.

Buǵan deıin Aqorda Qazaqstan Respýblıkasy men Oman Sultandyǵy arasyndaǵy birlesken málimdemeni jarııalady.