Oman Qazaqstanǵa Ortalyq Azııa tikeleı ınvestıtsııalar qoryn qurýda seriktes bolýdy usyndy
ASTANA. KAZINFORM – Premer-mınıstrdiń orynbasarlary Qanat Bozymbaev pen Serik Jumanǵarın Oman ınvestıtsııalyq bankiniń (OIB) ókili Ibragım Ál-Eıserımen eki el arasyndaǵy yntymaqtastyqtyń jańa formattaryn talqylady. Bul týraly Úkimettiń baspasóz qyzmeti habarlady.
Ibragım Ál-Eıserı Parsy shyǵanaǵy elderiniń Ortalyq Azııa aımaǵyna, atap aıtqanda, logıstıka salasyna ınvestıtsııa salýǵa qyzyǵýshylyq tanytatynyn atap ótti.
Taraptar Oman bankiniń Qazaqstandaǵy resmı ókildigin ashý máselesin qarastyrdy.
Oman delegatsııasy Qazaqstanǵa Parsy shyǵanaǵy, OA jáne Kavkaz elderiniń makroóńirleri arasyndaǵy ekonomıkalyq qatynastardy damytý maqsatynda Ortalyq Azııa tikeleı ınvestıtsııalar qoryn qurýda seriktes bolýdy usyndy.
Kezdesý Omannyń Syrtqy ister mınıstri Badr Ál-Býsaıdı myrzanyń Qazaqstanǵa resmı sapary jáne Astanada ótetin Qazaqstan-Oman úkimetaralyq komıssııasynyń 1-otyrysy qarsańynda ótti.
Óńirlik saıasat jobalyq keńsesiniń birinshi otyrysy vıtse-premer Qanat Bozymbaevtyń tóraǵalyǵymen ótkenin jazǵan bolatynbyz.