Oman Kaddafıdiń otbasyna saıası baspana berdi
ASTANA. 26 naýryz. QazAqparat - Oman Sultanaty Lıvııanyń burynǵy kóshbasshysy Mýamar Kaddafıdiń otbasyna saıası baspana usyndy, dep habarlady Reseı Jańalyqtar agenttigi.
Lıvııanyń syrtqy ister jáne halyqaralyq baılanystar mınıstri Muhammed Abdel Azız: «Bul adamgershilik turǵydan jasalǵan qadam boldy», - dep málim etti. Bul ýaqytqa deıin Kaddafıdiń otbasy Aljırde turyp keldi.
Kaddafıdiń áıeli Safııa, onyń qyzy Aısha men eki uldary Muhammed pen Gannıbal kóterilisshiler Trıpolıdi basyp alǵan 2011 jyldyń tamyzynda otbasylarymen birge Aljırge qashqan bolatyn. Aljır olarǵa saıası baspana berip, Lıvııanyń jańa basshylyǵyna berýden bas tartty.
Lıvııadaǵy qarýly qaqtyǵystar 2011 jyldyń aqpanynan qazan aıyna deıin jalǵasty. Basqarýshy rejımniń jaqtastary men oppozıtsııa kúshteri arasyndaǵy áskerı is-qımyldar barysynda bes myń adam qaza tapty.
El basshylyǵynda 42 jyl bolǵan Mýamar Kaddafı 20 qazan kúni Sırt qalasynyń mańaıynda ony tutqynǵa alǵan kóterilisshilerdiń qolynan kóz jumdy.
