Oman Iranǵa Ormýz buǵazyn birlesip basqarýdyń jańa tetigin usyndy
ASTANA. KAZINFORM — Ormýz buǵazy tóńiregindegi shıelenisti tómendetýge baǵyttalǵan dıplomatııalyq kúsh-jiger aıasynda óńir elderi buǵazdy basqarýdyń jańa tetigin talqylap jatyr. Bul týraly Kazinform agenttiginiń Taıaý Shyǵystaǵy menshikti tilshisi habarlady.
Oman Iranǵa Ormýz buǵazyn birlesip basqaratyn óńirlik basqarý tetigin qurý týraly usynys jasady. Bastamaǵa sáıkes, Tegeran álemdegi eń mańyzdy teńiz saýda joldarynyń biri sanalatyn bul buǵazdy jeke dara baqylamaıdy.
Bul týraly Reuters agenttigi Parsy shyǵanaǵyndaǵy elderdiń birindegi derekkózge silteme jasap habarlady.
Oman presented regional mechanism for Hormuz to Iran, source says https://t.co/23eqhvKEH9 https://t.co/23eqhvKEH9
— Reuters (@Reuters) July 28, 2026
Agenttiktiń málimetinshe, joba Parsy shyǵanaǵy memleketteriniń qoldaýyna ıe bolǵan. Ol Indonezııa, Malaızııa jáne Sıngapýr birlesip basqaratyn Malakka buǵazynyń úlgisi negizinde ázirlengen.
Usynysqa sáıkes, kemeler navıgatsııany damytýǵa, ekologııalyq qaýipsizdikti qamtamasyz etýge jáne izdestirý-qutqarý jumystaryn qarjylandyrýǵa arnalǵan arnaıy qorǵa erikti túrde jarna aýdara alady. Sonymen qatar Ormýz buǵazy arqyly ótkeni úshin mindetti tólem engizý qarastyrylmaǵan.
Ormýz buǵazy Parsy shyǵanaǵy men Oman shyǵanaǵyn jalǵap, álemdik energetıkalyq resýrstar saýdasyndaǵy eń mańyzdy teńiz baǵyttarynyń biri sanalady. AQSh, Izraıl jáne Iran arasyndaǵy qaqtyǵys bastalǵanǵa deıin álemdik munaı men suıytylǵan tabıǵı gaz jetkiziliminiń shamamen 20 paıyzy osy buǵaz arqyly tasymaldanǵan.
Reuters málimetinshe, Ormýz buǵazyndaǵy keme qatynasynyń bolashaqtaǵy tártibi qaqtyǵysty retteý jónindegi kelissózderdegi negizgi túıtkilderdiń biri bolyp otyr. Iran buǵazda soǵysqa deıingi erkin keme qatynasy rejımi qaıta ornamaýy kerek dep esepteıdi. Al Parsy shyǵanaǵy elderi kemelerden mindetti alym alý bastamasyna qarsy.
Buǵan deıin Irannyń Syrtqy ister mınıstri Abbas Arakchı Oman jáne Saýd Arabııasynyń syrtqy ister mınıstrlerimen telefon arqyly sóılesip, Ormýz buǵazyndaǵy jaǵdaıdy talqylady.
Iran, Oman, Saudi FMs discuss regional developments, stress diplomatic efforts for stabilityhttps://t.co/uyEpL91BvL pic.twitter.com/v25rHxHUPR
— IRNA News Agency ☫ (@IrnaEnglish) July 28, 2026
Iran Syrtqy ister mınıstrliginiń málimetinshe, taraptar óńirdegi turaqtylyqty qamtamasyz etý úshin aımaqtyq yntymaqtastyqty kúsheıtip, dıplomatııalyq kúsh-jigerdi jandandyrýdyń mańyzyn atap ótti.
Al AQSh prezıdenti Donald Tramp Vashıngton men Tegeran arasynda «syndarly kelissózder» jalǵasyp jatqanyn málimdedi. Sonymen birge ol kelissózder nátıjesiz aıaqtalsa, áskerı soqqylar qaıta jalǵasýy múmkin ekenin eskertti.
Eske salaıyq, buǵan deıin AQSh pen Iran arasyndaǵy áskerı is-qımyldardyń ýaqytsha toqtaýynan keıin munaı baǵasy kúrt tómendegeni habarlanǵan bolatyn. Sondaı-aq Iran men Oman Ormýz buǵazyndaǵy keme qatynasynyń qaýipsizdigin qamtamasyz etý máselesin talqylaǵan edi.
