Oman Iran elshisine narazylyq notasyn joldady
ASTANA. KAZINFORM — Oman ushqyshsyz ushý apparattarynyń shabýyldarynan keıin Iran elshisin shaqyryp, oǵan narazylyq notasyn tabystady, dep habarlaıdy Anadoly.
Oman bıligi Maskattaǵy Iran elshisi Musa Farhangty Syrtqy ister mınıstrligine shaqyryp, Mýsandam jáne Ál-Ýsta provıntsııalaryndaǵy birqatar nysanǵa jasalǵan dron shabýyldaryna baılanysty resmı narazylyq notasyn tapsyrdy.
Oman SІM málimetinshe, ákimshilik jáne qarjy máseleleri jónindegi syrtqy ister mınıstriniń orynbasary sheıh Halıd ben Hashıl ál-Mýslahı ırandyq dıplomatpen kezdesý ótkizgen.
Kezdesý barysynda ıran tarabyna Mýsandam jáne Ál-Ýsta provıntsııalaryndaǵy nysandarǵa jasalǵan ushqyshsyz ushý apparattarynyń soqqylaryna baılanysty resmı narazylyq notasy joldandy.
Ál-Mýslahı Maskattyń atalǵan shabýyldarǵa alańdaýshylyq bildiretinin aıtyp, memleketterdiń egemendigin, tatý kórshilik pen ishki isterge aralaspaý qaǵıdattaryn saqtaýǵa, sondaı-aq Oman men Iran halyqtaryn baılanystyratyn ortaq dástúrlerdi, tarıhı baılanystar men qundylyqtardy qurmetteýge shaqyrdy.
Buǵan deıin Oman bıligi Mýsandam jáne Ál-Ýsta provıntsııalaryndaǵy birneshe nysannyń kamıkadze-drondardyń shabýylyna ushyraǵanyn habarlaǵan edi. Alaıda shabýyl úshin jaýapkershilik resmı túrde eshbir tarapqa júktelgen joq.
Osydan buryn Oman men Iran Ormýz buǵazy boıynsha kelissózderdi jalǵastyrýǵa keliskenin jazǵanbyz.
