Oljas Súleımenovtiń nemeresi kóz jumǵan kólik apatyna qatysty sot otyrysy keıinge shegerildi
ASTANA. QazAqparat - Oljas Súleımenovtiń nemeresi Eskendir Súleımenovtiń jol apatynan kóz jumý jaǵdaıy boıynsha jábirlenýshi taraptyń sot otyrysyn shegerý týraly ótinishi maquldandy, dep habarlaıdy QazAqparat tilshisi.
Aıta ketsek, Astana qalasynyń Esil aýdandyq №2 sotynda Oljas Súleımenovtiń 26 jastaǵy nemeresi Eskendir Súleımenovtiń jol apatynan kóz jumý jaǵdaıy boıynsha sot protsesi búgin bastalǵan bolatyn.
Jábirlenýshi tarap kýágerlerdiń bári sotqa kele almaǵandyqtan, sot otyrysyn keıinge shegerýdi surady.
«Sot jábirlenýshi tarapynyń ókili Sandınov Damır Nurahmetulynyń ótinishin maquldaı otyryp, qylmystyq isti qaraýdy 17 qazan kúni saǵat 15:00-ge aýystyrady», - dedi sýdıa Qanat Tobaǵalıuly.
Eske sala ketsek, osy jyldyń maýsymynda Astanadaǵy jan túrshigerlik jol apatynda Oljas Súleımenovtiń 26 jastaǵy nemeresi Eskendir Súleımenov mert bolǵan edi. Apat 22 maýsym kúni Astanadaǵy «Máńgilik el» dańǵyly men «Kereı men Jánibek handar» kóshesiniń qıylysynda bolǵan. Mototsıkl tizgindegen Eskendirdi belgisiz kólik qaqqan.
Arada kóp ótpeı Astana qalalyq ishki ister departamenti apatqa sebepker bolýy múmkin «Hyundai» avtokóliginiń ıesi, 29 jastaǵy astanalyq áıelge qatysty tergeý amaldary júrip jatqanyn habarlaǵan edi.
Sondaı-aq Astana qalasynyń Іshki ister departamenti Oljas Súleımenovtiń nemeresi - Eskendir Súleımenovti kóligimen qaǵyp óltirgen júrgizýshi Qyzylorda oblystyq Іshki ister departamenti bastyǵynyń qyzy ekenin rastaǵan.
