Oljas Súleımenovtiń kóz jumǵan nemeresi Eskendir de óleń jazǵan
ASTANA. QazAqparat - Astanada jol apatynan mert bolǵan aqyn Oljas Súleımenovtiń nemeresi - Eskendir Súleımenovtiń ólimine qatysty búgingi sot protsesi aıaqtaldy. Sot otyrysynda marqumnyń dosy Qýanysh Turataev dosy Eskendirdiń qandaı adam bolǵanyn aıtyp berdi, dep habarlaıdy QazAqparat tilshisi.
«Men Eskendirdiń dosy ári áriptesimin. Biz ulttyq kompanııada bir jyldaı birge jumys istedik. Meniń áıelim men Eskendir Frantsııada birge oqyǵan. Meniń zaıybym ony óziniń baýyry dep esepteıtin. Ol bizdiń otbasy úshin óte jaqyn adam edi. Bir-birimizdi buryn syrttaı bilgenimizben, keıin Almatyda tanystyq. Eskendir senimdi dos ári áriptes edi. Qıyn sátterde senýge bolatyn naǵyz azamat bolatyn. Jaqyndary men týystarynyń qýanyshyna shyn júregimen qýana biletin. Ol shynaıy adam edi. Kókjıegi keń bolatyn. Ónerdi jaqsy túısindi, poezııany súıdi. Óleń jazyp júrdi. Italıan jáne aǵylshyn tilin jetik bildi», - deıdi Eskendirdiń dosy.
Onyń aıtýynsha, Eskendirdiń árbir jaǵdaıǵa qatysty ózindik pikiri bolatyn.
«Ol óte ashyq adam edi. Súıiktisin, týystaryn, dostaryn jaqsy kórdi. Biz únemi birge tústenetinbiz. Sondaı túski astardyń birinde úılený týraly usynysty qalaı jasaýǵa bolatyny jóninde aqyldasqanymyz bar. Onyń áriptesi retinde aıtarym - ol bizdiń kompanııanyń jaýapty departamentteriniń birinde eńbek etti. Jaýapkershiligi mol maman, salmaqty sarapshy boldy. Ujym ony baısaldy ári jaýapty maman retinde biledi. Onymen kez kelgen ýaqytta aqyldasyp, mańyzdy suraqtardyń jaýabyn tabýǵa bolatyn edi. Eskendirdiń dıplomatııalyq qasıetin bilgen basshylyq ony iskerlik kelissózderge jumyldyryp ta júrdi. Qysqasy, ony ujymda bári baǵalaıtyn, jaqsy kóretin», - dedi Qýanysh Turataev.
Dosynyń aıtýynsha, Eskendir shetelden oqyp kelgennen keıin óz Otanynyń damýyna úles qosýdy maqsat tutqan.
Eske sala ketsek, osy jyldyń maýsymynda Astanadaǵy jol apatynda Oljas Súleımenovtiń 26 jastaǵy nemeresi Eskendir Súleımenov mert bolǵan edi. Eskendir tizgindegen mototsıkl qıylysqa shyqqan kólikke soǵyldy.
Arada kóp ótpeı Astana qalalyq Іshki ister departamenti apatqa sebepker bolýy múmkin Hyundai avtokóliginiń ıesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Sondaı-aq, qalalyq polıtsııa departamenti Eskendir Súleımenovtiń mototsıkly soǵylǵan júrgizýshi Qyzylorda oblystyq Іshki ister departamenti bastyǵynyń qyzy ekenin rastaǵan.
Aıta ketsek, 12 qazanda Oljas Súleımenovtiń nemeresiniń ólimine qatysty sot protsesi bastalyp, Eskendir Súleımenov qaza tapqan jol apaty boıynsha sottalýshy Malıka Muhıtova marqumnyń ata-anasynan keshirim suraǵan edi.
