Oljas Súleımenov voleıboldan halyqaralyq týrnırde úzdik oıynshy atandy
ATYRAÝ. QazAqparat - Atyraý qalasynda Dinmuhamed Ahmetuly Qonaevty eske alýǵa arnalǵan voleıboldan ardagerler arasynda halyqaralyq týrnır máresine jetti, dep habarlaıdy QazAqparat tilshisi.
Oblystyq sport basqarmasynyń baspasóz hatshysy Іlııas Shaıhıevtiń aıtýynsha, úsh kún boıy Ózbekstan astanasy Tashkent qalasynyń, elimizdiń Shyǵys Qazaqstan, Jambyl oblystary men Almaty, Shymkent, Aqtaý, Astana jáne Atyraý qalalarynyń myqtylary júldelerdi ózara sarapqa saldy.
Jarys jeńimpazy bolyp Almaty qalasynyń «Kaznaý Býrevestnık» qurama komandasy tanyldy. Qazaqstannyń Eńbek Eri, aqyn, jazýshy Oljas Súleımenov bastaǵan komanda barlyq qarsylastaryn aıqyn basymdylyqpen utty.
Ekinshi oryndy Aqtaý qalasynyń «Mańǵystaý» komandasy enshilese, úzdik úshtikti Taraz qalasynyń «Ardager» komandasy qorytyndylady.
Jarystyń úzdik oıynshysy bolyp Oljas Omaruly tanyldy. 83 jastaǵy ardagerge dástúr boıynsha «at» mingizildi. Osymen onynshy márte uıymdastyrylǵan týrnırge jarys qonaqtary joǵary baǵasyn berdi.
Jarystyń ashylý saltanatynda Halyq jazýshysy 90 jasqa kelgenshe voleıbol oınaǵysy keletinin aıtyp ótti.
«Batyrlar eline kelgende barlyq marapatymdy ysyryp qoıyp, osy bir tósbelgini taǵýdy uıǵardym. Sebebi bul maǵan degen kúlli Batys óńiriniń jasaǵan qurmeti», - deıdi Oljas Omaruly.
