Oljas Súleımenov «Nevada-Semeı» qozǵalysynyń jınalysyn ótkizbekshi

ASTANA. QazAqparat - Qoǵam qaıratkeri Oljas Súleımenov «Nevada-Semeı» qozǵalysynyń Halyqaralyq konferentsııasyn ótkzýdi josparlap otyr, dep xabarlaıdy QazAqparat tilshisi.

«Kelesi jyly aqpan aıynda biz konferentsııany ótkizemiz. Atalǵan shara «Nevada-Semeı» qozǵalysynyń 30 jyldyǵyna arnalady. Oǵan Japonııa, AQSh jáne taǵy basqa elderdi shaqyramyz. Sol jerde ıadrolyq qarýsyzdandyrý salasyndaǵy qoǵamdyq uıymdardyń rólin talqylaıtyn bolamyz», - dedi O.Súleımenov Astanada ótken konferentsııada.

Onyń aıtýynsha, «Nevada-Semeı» qozǵalysy qurylǵan jyldary qoǵamdyq uıymdardyń belsendiligi joǵary bolǵan. Qazaqstandyq uıymnyń bastamasymen ıadrolyq qarýǵa qarsy Jahandyq alıans ta qurylǵan edi. Oǵan osy saladaǵy barlyq birlestikter kirdi. Sol kezde jumys baǵdarlamasy ázirlenip, qoǵamdyq uıymdardyń qyzmeti boıynsha naqty jobalar da usynyldy. Sonyń biri - parlamentaralyq referendým.

«Biz «Jer-jahanda ómirdi saqtap qalý úshin ıadrolyq qarýdyń qajeti bar ma?» degen naqty bir suraqty ǵana kún tártibine engizýdi kózdedik. Barlyq parlamentter osy suraqqa «ıá» nemese «joq» degen naqty jaýap berýge tıisti. Sonda KSRO-nyń Joǵarǵy keńesi birinshi bolyp «joq» degen jaýap beremiz dedi. Artynan AQSh Kongresi de solaı isteıdi degen jospar boldy. Aradaǵy baılanysymyz da jaqsy boldy. Reıgan da qoldady. Sonda bizdiń «Álemniń barlyq saılaýshylary ıadrolyq qarýǵa qarsy!» degen uranymyz óz nátıjesin beretin edi. Biraq Keńester Odaǵy ydyrady. Ókinishke qaraı, Jahandyq alıans ta óz jumysyn toqtatty», - dep atap kórsetti O.Súleımenov.

Aıta keteıik, búgin Astanada «Qazaqstan men Japonııanyń ıadrolyq qarýsyzdandyrý salasyndaǵy yntymaqtastyǵy: Bir taǵdyr, jalpy maqsat» taqyrybynda xalyqaralyq konferentsııa ótti. Sharanyń uıymdastyrýshylary - QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýty, sondaı-aq, Goı beıbitshilik qory. Konferentsııada ıadrolyq qarýsyzdandyrý salasyndaǵy ózekti máseleler talqyǵa salyndy. Sol jerde QR Parlament Májilisiniń depýtaty Abaı Tasbolatov keńester kezinde áskerdiń ıadrolyq soǵysqa qalaı daıyndalǵanyn aıtyp berdi.

Al Goı beıbitshilik qorynyń prezıdenti Hıroo Saıondjı qazirgi ıadrolyq qarýdyń qanshalyqty qaýipti ekenin jetkizdi.