Oljas Súleımenov «Qazaqstan halyq kongresi» partııasyn qurady

ALMATY. QazAqparat- Aqyn, Qazaqstannyń halyq jazýshysy, lıngvıst-zertteýshi, túrkolog, memleket jáne qoǵam qaıratkeri Oljas Súleımenov «Qazaqstan halyq kongresi» partııasyn qurady. Bul týraly ol baspasóz máslıhatynda málim etti, dep habarlaıdy QazAqparat tilshisi.

«Partııa «Qazaqstannyń halyq kongressi» dep atalady. Tirkeýden ótý úshin Ádilet mınıstrligine qujattardy jiberdik», - dedi Oljas Súleımenov.

Sonymen qatar ol jer jáne onyń qoınaýy halyqqa tıesili bolýy kerek ekenin, árbir qazaqstandyqqa ulttyq resýrstardan kepildendirilgen tabys túsýi qajettigin atap ótti.

«Biz dıalog alańyn qurdyq. Oǵan árbir qoǵam múshesin shaqyramyz. Qýatty Qazaqstandy damytatyn jáne ony júzege asyratyn baǵdarlama daıyndadyq. Maqsat — kemshilikterdi saraptap, oǵan qajetti qadamdar jasaý»,- dedi ol.

Onyń aıtýynsha, 1995 jyly jabylyp qalǵan «Qazaqstan halyq kongresi» partııasy qaıta jandandy.

«Men búgin osy partııanyń negizin qalaýshy retinde qol qoıdym. Ol 1992 jyly qurylǵan bolatyn. Araǵa 30 jyl salyp partııa qaıta jandanyp jatyr. Oǵan kez kelgen adam múshe bola alady. Tirkelý úshin 1000 qol jınadyq, taǵy 25 myń ótinish bar», – deıdi aqyn.