Oljas Súleımenov ádebıettiń tańǵajaıyp fenomeni- Almatyda aqynǵa arnalǵan konferentsııa ótip jatyr

ALMATY. QazAqparat - Almatyda kórnekti aqyn Oljas Súleımenovtiń 85 jyldyǵyna arnalǵan «Tanyp – bilip ózimizdi ózgeden, biz kóshemiz ózimizge bet alyp: Oljas jáne mádenıettterdi jaqyndastyrý» atty halyqaralyq ǵylymı konferentsııa ótip jatyr, dep habarlaıdy QazAqparat tilshisi.

Konferentsııanyń maqsaty- Oljas Súleımenovtiń ómirindegi ádebı, ǵylymı jáne qoǵamdyq-saıası ıdeıalar men qundylyqtardy túsiný jáne zertteý.

Shara barysynda mereıtoı ıesi Oljas Súleımenov Qazaqstan Respýblıkasynyń Prezıdenti Qasym-Jomart Toqaevty týǵan kúnimen quttyqtady.

«Kelińizder, bárimiz birge sálem joldaıyq jáne týǵan kúnmen quttyqtaıyq!», - dedi aqyn.

Keıin konferentsııanyń barlyq qatysýshylary Oljas Súleımenovti mereıtoıymen quttyqtady. Atap aıtqanda, Qazaqstan Respýblıkasynyń Mádenıet jáne sport mınıstri Aqtoty Raıymqulova, ýnıversıtet rektorlary, professorlar, aqynyń dostary men áriptesteri.

Konferentsııada 3 sessııa jumysy josparlanǵan. Onyń aıasynda Oljas Súleımenovtiń ómir jolyndaǵy negizgi baǵyttaryn jáne onyń adamzat tarıhyndaǵy rólin uǵyný jáne zertteý usynylady:

1 sessııa – «Oljas Súleımenov: planetarlyq poetıka». Sessııa aıasynda Oljas Súleımenovtyń ádebı fenomeni men poezııasyn uǵyný.

2 sessııa– «Sóz kody: tarıh jáne lıngvıstıka». Sessııa aıasynda Oljas Súleımenovtiń tarıhı-lıngvıstıkalyq tujyrymdamasyn jáne onyń perspektıvalarynyń damýyn talqylaý.

3 sessııa – «Taýdy alasartpaı, dalany asqaqtatý». Sessııa aıasynda Oljas Súleımenovtiń elimizdegi jáne álemniń qoǵamdyq-saıası ómirindegi rólin túsiný.

Atalǵan shara QR Mádenıet jáne sport mınıstrligi ıÝNESKO qamqorlyǵyndaǵy Halyqaralyq mádenıetterdi jaqyndastyrý ortalyǵy «Mádenıetterdi jaqyndastyrýdyń halyqaralyq onjyldyǵy» (2013-2022 jj.) aıasynda Almaty qalasynyń ákimdigimen birlesip uıymdastyryldy.

Oljas Súleımenov – XX-XXI ǵasyrlardaǵy asa kórnekti aqyn, búkil álemge óziniń poezııasymen ǵana emes, qoǵamdyq-saıamı qyzmetimen de tanymal tulǵa. Oljas Omaruly ár jyldary QazKSR Jazýshylar Odaǵyn basqaryp, Qazaq KSR kınematografııa jónindegi memlekettik komıtetiniń tóraǵasy, kóp jyl boıy QazKSR Joǵarǵy Keńesiniń depýtaty boldy. 1995-2001 jyldary aralyǵynda QR-nyń Italııa, Gretsııa, Maltadaǵy Tótenshe jáne Ókiletti elshisi, 2001-2014 jyldary – Qazaqstannyń ıÝNESKO- daǵy Turaqty ókili boldy.

Oljas Súleımenovtiń poezııasy-ádebıettiń tańǵajaıyp fenomeni. Aqynnyń ómirbaıany men ómirsheńdigi avangard poetıkasyn, dala motıvteri men tehnogendik dáýirdiń kosmızmin, mádenıetterdiń dıalogy men dıalektıkasyn – biriktiredi.

Oljas Súleımenovtiń óleńderi men poemalary aǵylshyn, frantsýz, nemis, ıspan, cheh, polıak, slovak, bolgar, majar, mońǵol, qyrǵyz, túrik jáne basqa da tilderge aýdarylǵan.