Oljas Ordabaev: Ózin-ózi jumyspen qamtyǵandar kóbeıse, kadr tapshylyǵy týyndaıdy

Qazir Qazaqstanda eńbek etip júrgen jaldamaly jumyskerlerdiń ortasha jasy 30-45 aralyǵynda. Bul týraly elordada ótken HR-forýmda baıandama jasaǵan Eńbek jáne halyqty áleýmettik qorǵaý vıtse-mınıstri Oljas Ordabaev aıtty, dep habarlaıdy QazAqparat tilshisi.

«Ózin-ózi jumyspen qamtyǵandar arasynda joǵary bilimi bar adamdardyń sany artyp keledi, ıaǵnı jaldamaly jumysshylar naryǵyndaǵylar kásipkerlikke bet buryp jatyr», - dedi Oljas Ordabaev.

Eńbek mınıstrliginiń derekteri boıynsha, jaldamaly jumyskerler naryǵynda jastardyń úlesi azaıyp keledi.

«Biz baıqap otyrǵandaı, jyl saıyn frılans baǵytyna ketip jatqan jastar kóbeıdi. Degenmen, frılans árqashan tıimdi jáne nátıjeli bola bermeıdi. Sondyqtan, eńbek adamynyń bedelin arttyrý kerek. Qazir jaldamaly jumyskerlerdiń ortasha jasy – 30-45 aralyǵy. Al ózin-ózi jumyspen qamtyǵandar arasynda 16-30 jastaǵylar kóp. Osylaı jalǵasa berse, turaqty demografııalyq jaǵdaıǵa qaramastan, bizde kadr tapshylyǵy bolýy yqtımal», - dep derekter keltirdi Oljas Ordabaev.

Sonymen birge, vıtse-mınıstr jumys kúshiniń sapasyn arttyrý máselesin sheshý mańyzdy ekenin atap ótti.

«Buryn Ekonomıkalyq yntymaqtastyq jáne damý uıymynyń sarapshylary bilim men daǵdylar 10 jyl ózektiligin joımaıdy degen paıym aıtqan edi. Al qazir qandaı da bir sala boıynsha bilimdi 2-5 jylda tolyqtyryp otyrý qajet. Alaıda, bizde jaldamaly jumysshylardyń shamamen 7%-y ǵana jumys berýshiler esebinen biliktiligin arttyrady. Sondyqtan, jumys kúshiniń sapasyna qatysty suraqtar ózekti bolyp qalyp otyr», - dedi Oljas Ordabaev.

Buǵan qosa ol, jumys oryndaryn qurý úderisi jalpy ishki ónimniń ósý qarqynynan qalys qalyp jatqanyn aıtty.