Oljas Nuraldınov Májilis depýtaty retinde ant berdi

ASTANA. KAZINFORM – Búgin Parlament Májilisiniń jalpy otyrysynda Oljas Nuraldınov depýtat retinde ant berdi.

Májilis tóraǵasy Erlan Qoshanovtyń aıtýynsha, «Aq jol» partııasynyń sheshimimen rotatsııa arqyly depýtat Erjan Beısenbaevtyń ókilettigi toqtatyldy. Osy oraıda O.Nuraldınov Ortalyq saılaý komıssııasynyń qaýlysymen Májilis depýtaty retinde tirkeldi.

– Qazaqstan halqyna adal qyzmet etýge, Qazaqstannyń tutastyǵy men táýelsizdigin nyǵaıtýǵa, onyń Konstıtýtsııasy men zańdaryna qatań baǵynýǵa, depýtattyń ózime júktelgen mártebeli mindetterin adal atqarýǵa ant etemin, – dedi O.Nuraldınov.

Sonymen qatar Oljas Eltaıuly Májilistiń Qarjy jáne bıýdjet komıtetiniń quramyna saılandy.

Aıta keteıik, 2025 jylǵy 27 tamyzda QR Ortalyq saılaý komıssııasynyń otyrysy ótip, «Qazaqstan Respýblıkasy Parlamenti Májilisiniń depýtaty O.E. Nuraldınovty tirkeý týraly» qaýly qabyldady.

- Qazaqstan Respýblıkasy Parlamentiniń Májilisi depýtatynyń bos mandaty «Aq jol» Qazaqstannyń demokratııalyq partııasynyń» múshesi Oljas Eltaıuly Nuraldınovke berilsin, - delingen qaýlyda.

Elimizdiń Ónerkásip jáne qurylys mınıstri qyzmetine kirisken Ersaıyn Naǵaspaev Úkimet úıinde ant qabyldaǵanyn jazǵan bolatynbyz.