Oljas Quspekov: Shekarashylarmen birge jattyǵyp, jumys jaǵdaılaryn zertteımiz

QONAEV. QazAqparat – Májilis depýtattary Almaty oblysynyń taýly aımaǵyndaǵy lagerde shekarashylarmen birge daıyndyqtan ótip jatyr. Olardyń qajettilikterin tolyq túsiný úshin jumysty shekara beketinde jalǵastyrýǵa nıetti, dep habarlaıdy QazAqparat «Respublica» partııasynyń baspasóz qyzmetine silteme jasap.

Májilis depýtattary Oljas Quspekov, Maksım Rojın, Bolat Kerimbek jáne Samat Nurtaza bastamashylyq etip barǵan sapardyń maqsaty – shekarashylardyń jumys jaǵdaıymen tanysý.

«Bizdiń jumysymyz – tek zań shyǵarý aınalasynda ǵana shektelmeıdi, sonymen qatar naqty áreketter jasaý qajet. Munda biz birneshe apta boıy shekarashylarmen birge daıyndyqtan ótip, olardyń jumys jaǵdaılaryn zertteımiz. Olarǵa el qorǵaýda jaǵdaı jasaý úshin, qajet jaǵdaıda usynystar engizetin bolamyz. Mundaı tájirıbe bizdiń qorǵaýshylarymyzdyń shekara shebinde kezdesetin qıyndyqtaryn túsinýge, sol baǵytta jumys isteýge kómektesedi», - dep túsindirdi májilismen Oljas Quspekov.

Demek, shekara beketinde júrgizilgen zertteý jáne taldaý shekaralyq qaýipsizdik pen jumys jaǵdaılaryn jaqsartýǵa baǵyttalǵan zańnamalyq bastamalar men sharalardy ázirleýge negiz bolady.

Qazirgi ýaqytta depýtattar shekara aımaǵynda, taýdaǵy jattyǵý lagerinde daıyndyqtan ótip jatyr. Keıin olar shekara qorǵaýshylarynyń qyzmeti men qajettilikterin tolyq túsiný úshin shekara beketinde jumysyn jalǵastyrýǵa nıetti. Zertteý aıaqtalǵannan keıin óz usynystaryn Májilis otyrysynda kóterýdi josparlap otyr.