Oljas Qudaıbergenov QR Ulttyq banki basshysynyń keńesshisi qyzmetimen qosh aıtyspaq
ALMATY. QazAqparat - QR Ulttyq banki basshysynyń keńesshisi Oljas Qudaıbergenov óz erkimen qyzmetinen ketedi. Bul týraly ol óziniń Facebook-taǵy paraqshasynda málim etken.
«Qoǵamda ekonomıkaǵa qatysty beıtarap pikirlerge degen qajettilik baıqalady. Men osyndaı qorytyndyǵa keldim. Al meniń bul týraly pikirlerim qoǵamda «Ulttyq banktiń qyzmetkeriniń pikiri» retinde ǵana qabyldanyp júr. Óıtkeni men ol jerden jalaqy alamyn ǵoı. Eger men buryn ózimniń pikirlerim men saraptamalarym úshin tek alǵys alyp kelsem, qazir birqatar adamdar olardy jaqyn qabyldamaıtyn boldy», - dep jazady O. Qudaıbergenov.
Ol eńbek kelisimshartyn 2015 jyldyń 1 qańtarynan ári qaraı uzartpaýdy jón kóripti. Bul týraly basshylyqqa eskertip te qoıǵan.
«Árıne, keıbir jaıttardy áli naqtylaý kerek. Biraq sheshim qabyldanyp qoıyldy. Aldaǵy jyldyń 1 qańtarynan bastap Makroekonomıkalyq zertteýler ortalyǵyna oralamyn (bıyl ol jaqtan maǵan zertteýler jasap berý týraly ótinishter jıi tústi). Sonymen qatar men «táýelsiz dırektor» nemese «konsýltant» bolý týraly usynystardy da qaraýǵa daıynmyn. Óıtkeni mundaı laýazymdar meni jumys ornyna táýeldi etpeıdi jáne makaroekonomıkalyq taqyryptardy talqylaý aıasynda mindetteme júktemeıdi», - dedi ol.
O.Qudaıbergenov sondaı-aq Qazaqstan ekonomısteri qaýymdastyǵynyń atqarýshy dırektory bolyp qala beretindigin jetkizdi. Jáne ol «Taiburyl» qaıyrymdylyq qorynyń damýyna da yqpal jasaıdy. Oǵan qosa, aldaǵy jyldyń qańtarynan bastap elimizdegi joǵary oqý oryndarynyń birinde dáris oqıtyn bolady.
«Degenmen, men shtattan tys keńesshilik quqyǵymdy saqtap qaldym (bul tólenbeıtin qyzmet), ıaǵnı Qaırat Kelimbetovpen bıýrokratııalyq kedergilersiz turaqty túrde kezdesip, usynystar aıtýǵa múmkindik bolady», - dedi ol.
Aıta ketelik, Oljas Qudaıbergenov QR Ulttyq banki basshysynyń keńesshisi qyzmetine bıyl qańtar aıynda taǵaıyndalǵan bolatyn.
