Oljas Qudaıbergenov: Іshki ınvestorlardy aýqymdy jobalarǵa tartý qajet

ASTANA. QazAqparat – Prezıdent Joldaýyndaǵy ulttyq ekonomıkanyń kólemin 2029 jylǵa deıin eki ese arttyrý týraly tapsyrmany qalaı iske asyrýǵa bolady? Ekonomıst Oljas Qudaıbergenov Jibek Joly arnasynyń JJ-Talk baǵdarlamasynda osy suraq tóńireginde oı órbitti, dep habarlaıdy QazAqparat tilshisi.

Memleket basshysy Qasym-Jomart Toqaev «Ádiletti Qazaqstannyń ekonomıkalyq baǵdary» atty Joldaýynda ulttyq ekonomıkanyń kólemin eki ese arttyryp, 450 mlrd dollarǵa jetkizý qajettigin aıtqan bolatyn.

Oljas Qudaıbergenovtiń paıymynsha, bul mejeni baǵyndyrýǵa el ekonomıkasynyń qaýqary jetedi. Tek ol úshin ınvestıtsııalyq saıasatty saýatty uıymdastyrý kerek.

«Negizi ekonomıkada aqsha kóp. Mysaly, bizdegi bıýdjettiń kólemi 25 trln teńge bolsa, onyń tapshylyǵy – 3,5 trln teńge. Biraq, qazir ol Ulttyq qor arqyly jabylady. Somamen aıtqanda, 3,5 trln teńge degen óte úlken bolyp kórinedi. Onyń jalpy ishki ónimdegi úlesi - 2,5 paıyz. Normatıv boıynsha bıýdjet tapshylyǵynyń jalpy ishki ónimdegi úlesi 3 paıyzdan aspaý kerek. Odan tómen bolsa, ol problema emes. Sondyqtan, aqsha joq dep aıtýǵa kelmeıdi», - deıdi sarapshy.

Ekonomıst aýqymdy jobalarǵa syrttan ınvestor izdeı bermeı, ishtegi áleýetti ınvestorlarǵa ońtaıly sharttar usynýǵa bolatynyn aıtady.

«Árıne, ekonomıkadaǵy aqsha aýqymdy jobalarǵa jetpeýi múmkin. Ondaı kezde ınvestorlar tartý kerek nemese syrttan nesıe ákelýge bolady. Negizi ekonomıkada aqsha kóp. Ózimizdiń ishki ınvestoralymyz bar. Solarǵa durys sharttar belgilense, aýqymdy jobalarǵa aqshasyn salar edi», - dedi ol.