AI-di damytýdyń birneshe joly bar - Qatarda jumys isteıtin Oljas Erǵalıev
ASTANA. KAZINFORM – Qatarda ІT salasynda eńbek etip júrgen Oljas Erǵalıev Qazaqstanda jasandy ıntellektini birneshe jolmen damytýǵa bolady dep esepteıdi.
Ol Qatar kompanııasynyń Almatydaǵy keńsesinde jumys istep júrip, bul elge issaparmen jıi baratyn. 2022 jyly Qatarda ótken fýtboldan álem chempıonatymen tuspa-tus kelgen sapary barysynda kompanııa basshylyǵy Oljasqa qonys aýdarýǵa usynys jasaıdy. Osylaısha, 2 jyl buryn ol Qatarǵa qonys aýdarsa, osydan 6 aı buryn otbasyn da kóshirdi. Oljas prodakt menedjer bolyp jumys isteıtin Snoonu kompanııasy Qatardaǵy startaptar arasynda kóshbasshy sanalady. Kompanııa ártúrli jobany, onyń ishinde tamaq tehnologııasy men qarjylyq qyzmetterdi júzege asyrady ári qoldanbalaryn jasandy ıntellekt baǵytynda da tıimdi kádege jaratady.
«Qatarda IT sektory memlekettik qoldaýdyń jáne iri halyqaralyq kompanııalar ınvestıtsııasynyń arqasynda qarqyndy damyp keledi. Munda ozyq tehnologııalardy paıdalana otyryp, ınnovatsııalyq jobalarmen jumys isteýge bolady. Sonymen qatar bos jumys oryndaryna básekelestik óte joǵary. Óıtkeni, elge álemniń túkpir-túkpirinen kóptegen joǵary bilikti mamandar keledi. Qazaqstanda da kóptegen tamasha kompanııalar men tájirıbeli mamandar bar. Biraq ókinishke qaraı naryq basqa elderdegideı úlken emes. Bos jumys oryndaryna da báseke sonshalyqty joǵary deı almaımyn. Dál osy jaıt baǵa jetpes tájirıbe jınaqtaı otyryp, mansap satysymen jyldamyraq kóterilýge múmkindik beredi», - dedi ol.
Onyń atap ótýinshe, Qatarda ekonomıkany tsıfrlandyrý úshin naqty baǵyttar bar. Sonyń arqasynda el jańa munaı, jasandy ıntellekt sııaqty perspektıvalyq baǵyttardy damytyp, resýrstyq ekonomıkaǵa táýeldilikti azaıtý arqyly bolashaqta básekelestik artyqshylyqqa ıe bolmaq.
«Mundaı baǵdarlamalar Qazaqstanda da belsendi damyp keledi jáne ýaqyt óte kele Úkimet bul salalardy odan ári yntalandyrady dep senemin. Bizde jaǵdaı jasalsa qyzyqty jobalar usynyp, elimizge paıda ákeletin kóptegen jas maman bar», - dedi ІT mamany.
Sonymen qatar ol Qazaqstanda jasandy ıntellektini damytý úshin ne isteý kerektigine toqtaldy.
«Menińshe, neırondyq jelilerdi jáne basqa da jasandy ıntellekt quraldaryn paıdalanýdy bilim berýdiń bastapqy kezeńinen qolǵa alý kerek. Mektepterde jasandy ıntellektini paıdalanýǵa lıtsenzııa satyp alyp jatqan elder bar. Bul – múmkindik. Naryqtyq ózgeristerge tez beıimdelý de artyqshylyq beredi. Osy baǵytta damyp, jobalardy júzege asyrý úshin eń aldymen jas mamandardy keńinen nasıhattap, yntalandyrý qajet.
Birinshi – jasandy ıntellekt salasynda joǵary bilikti kadrlar daıarlaýdy keńeıtý. Ol úshin elimizdiń jetekshi joǵary oqý oryndarynda zamanaýı bilim berý baǵdarlamalaryn qurýdy yntalandyrýǵa, sondaı-aq tájirıbe almasýǵa sheteldik mamandardy belsendirek tartýǵa bolady.
Ekinshi – taý-ken ónerkásibi, medıtsına, memlekettik basqarý, aýyl sharýashylyǵy sııaqty basym sektorlarda jasandy ıntellekt tehnologııalaryn engizýdi yntalandyrý. Bul olardyń tıimdiligi men básekege qabilettiligin arttyrady. Qatarda mundaı baǵdarlamalar qazirdiń ózinde bar. Múddeli mamandar men kásipkerler arasynda memlekettiń naqty qajettilikterin qanaǵattandyrý úshin sheshimder izdestiriledi.
Al eń mańyzdysy – jasandy ıntellekt salasynda startaptardy damytýǵa qolaıly jaǵdaı jasaý, ıaǵnı bıýrokratııalyq kedergilerdi azaıtý, salyq rejımin jeńildetý, tehnoparkter men akseleratorlardy qurý qajet. Bul is-sharalardy júzege asyrý Qazaqstanda jasandy ıntellekttiń damýyn aıtarlyqtaı jedeldetetinine senimdimin ári elimiz bul salada óńirlik kóshbasshy bolýy úshin úlken áleýeti bar», - dedi Oljas Erǵalıev.
