Oljas Bektenov jylý jelilerin jóndeý týrasynda: oılanyp-tolǵanyp júrýge ýaqyt joq
ASTANA. KAZINFORM – Bıyldyń ózinde 130 shaqyrym jylý jelileri men 10,5 myń shaqyrym elektr jelilerin jańǵyrtý josparlanǵan. Bul týraly Úkimet otyrysynda Premer-mınıstri Oljas Bektenov málim etti.
Úkimet basshysynyń aıtýynsha, ótken jylý berý maýsymy asa bir qaýipti apattyq jaǵdaılarsyz aıaqtaldy. Elektr stantsııalaryndaǵy tehnologııalyq buzylýy deńgeıi byltyrǵy jylmen salystyrǵanda 15%-ǵa azaıdy.
- Atalǵan faktiler ótken qys mezgiline daıyndyq jumystarynyń edáýir joǵary bolǵanyn bildiredi. Memleket basshysy halyqqa Joldaýynda energetıkalyq ınfraqurylymdy jáne kommýnaldyq sharýashylyqty jańǵyrtý mindetin qoıdy. «Tarıfti ınvestıtsııaǵa aıyrbastaý» baǵdarlamasy aıasynda bıyl elektr stantsııalaryn jóndeý jáne jańǵyrtý jumystaryna shamamen 384 mlrd teńge qaralǵan, bul ótken jylmen salystyrǵanda 9%-ǵa kóp. Sondaı-aq elimizdiń energetıkalyq ınfraqurylymyn jańǵyrtý jónindegi ulttyq joba qarqyndy iske asyrylyp jatyr. Tek bıyldyń ózinde 130 shaqyrym jylý jelileri men 10,5 myń shaqyrym elektr jelilerin jańǵyrtý josparlanǵan, - dedi O. Bektenov.
Onyń aıtýynsha, atalǵan sharalar jelilerdiń tozý deńgeıin tıisinshe 48 jáne 62%-ǵa deıin tómendetýge múmkindik beredi.
- Endi kelesi jylytý maýsymyna sapaly daıyndyqty qamtamasyz etý kerek. Bul – óńirlerdiń aldynda turǵan negizgi mindet. Energııa kózderi men jelilik jabdyqtardy jóndeý jáne aýystyrý boıynsha josparly jumystardy jalǵastyrý qajet. Jylý jelilerin der kezinde ári sapaly synaqtan ótkizý kerek. Oılanyp-tolǵanyp júrýge ýaqyt joq. Barlyq jumys belgilengen merzimde jáne tolyq kólemde oryndalýǵa tıis. Jaz boıy jumysty kúsheıtińizder. Úkimet tarapynan barlyq qajetti qoldaý kórsetilip jatyr. Ótken aptada Sklıar Roman Vasılevıch barlyq óńirlerdiń energetıka jáne turǵyn úı-kommýnaldyq sharýashylyǵy basqarmalary basshylarynyń esepterin tyńdady. Búginde Úkimet rezervinen 25 mlrd teńgeden astam qarjy bólý týraly sheshim maquldandy, - dedi Premer-mınıstr.
Atalǵan qarajat Jetisý, Abaı, Aqmola jáne Shyǵys Qazaqstan oblystarynda jylý kózderin jóndeý men salýǵa, sondaı-aq tórt óńirde 30 shaqyrymǵa jýyq jylý jelilerin jóndeýge baǵyttaldy.
- Osy qarajattyń tıimdi jumsalýyn jáne qol jetkizilgen nátıjelerdi baqylaýda ustaý qajet, - dep tapsyrdy O. Bektenov.
Budan buryn habarlanǵandaı, el aýmaǵynda 2025 jyly elektr energııasyn tutyný 2024 jylmen salystyrǵanda 4,6 mlrd kVt/saǵatqa nemese 3,8 paıyzǵa artyp, 124,6 mlrd kVt/saǵatty qurady.
