Oljas Bektenov jylytý maýsymyna daıyn emes óńir ákimderine eskertý jasady
ASTANA. KAZINFORM – Búgin Úkimet otyrysynda Premer-mınıstrdiń birinshi orynbasary Roman Sklıar óńirlerdiń jylytý maýsymyna daıyndyǵyna qatysty esep berdi.
- Búgingi tańda jylytý maýsymy Pavlodar oblysynyń áleýmettik nysandaryna bastaldy. 1 qazanǵa deıin ony soltústik óńirlerde bastaý josparlanǵan. Belgilengen kestege sáıkes, 2025 jylǵa 10 energoblokty, 63 qazandyqty jáne 39 trýbınany kúrdeli jóndeý josparlanǵan. 6 energoblokta, 28 qazandyqta jáne 13 trýbınada jóndeý jumystary aıaqtaldy. Qalǵan jumystar jalǵasyp jatyr. 15 300 shaqyrym elektr berý jelileri, 363 qosalqy stansa jáne 3 300 taratý pýnktteri men transformatorlyq qosalqy stansa jóndeldi. Jylýmen jabdyqtaý jelilerinde jóndeý jumystary josparlanǵan 323 shaqyrym jylý jelileriniń 280 shaqyrymy jóndeldi, - dedi birinshi vıtse-premer.
Onyń aıtýynsha, birqatar óńirde jóndeý jumystaryn jedeldetý qajet.
- Stepnogorsk qalasynda jylý jelilerin qaıta qurý 81 paıyzǵa oryndaldy. 1,6 shaqyrym jylý jelisiniń 1,3 shaqyrymy jóndeldi. Oral qalasynda3,9 shaqyrym jylý jelisiniń 2,5 shaqyrymy qaıta jańartyldy. Aıagóz qalasynda jylý jelilerin jóndeý tek 41 paıyz aıaqtaldy. Al 5 qazandyqtyń 3-eýi 70 paıyzǵa, 2 qazandyq 25 paıyzǵa daıyn. Sápbaevta birinshi jylý stansasynyń qazandyǵynyń daıyndyǵy ortasha eseppen 80 paıyz. Ortalyqtandyrylǵan qazandyqtarda 47 qazandyqty jóndeý jáne jańartý josparlanǵan. 14 qazandyqta jumys tolyǵymen aıaqtaldy, - dedi Roman Sklıar.
Osy rette Úkimet basshysy Oljas Bektenov Aqmola, Batys Qazaqstan, Abaı jáne Ulytaý oblystarynyń ákimderine jóndeý jumystarynyń aıaqtalýyn qatań baqylaýǵa alýdy tapsyrdy.
- Kelesi otyrysqa deıin aıaqtańyzdar. Jumystyń sapasy basty nazarda bolýǵa tıis. Tapsyrma oryndalmasa, tıisti sheshimder qabyldanady. Bul – barlyq óńirge qatysty másele. Jylý berý maýsymyn ýaqytyly bastaý qajet. Aǵymdaǵy ahýaldy kelesi Úkimet otyrysynda qaraıtyn bolamyz, - dep eskertti Premer-mınıstr.
Aıta keteıik, otyrysta Úkimet músheleri Prezıdent Joldaýyn júzege asyrý jónindegi jalpyulttyq is-sharalar josparyn maquldady.