Oljas Bektenov «Jezqazǵan – Qyzylorda» avtojoly rekonstrýktsııasyn tekserdi
JEZQAZǴAN. KAZINFORM — Úkimet basshysy Ulytaý oblysyna jumys sapary aıasynda «Jezqazǵan – Qyzylorda» avtojoly qurylysynyń qarqynymen tanysty.
Úkimettiń baspasóz qyzmeti habarlaǵandaı, ony qalpyna keltirý birqatar óńirdiń, onyń ishinde Ulytaý oblysynyń damýyna serpin berýi tıis. Premer-Mınıstrge búginde «Jezqazǵan – Qyzylorda» jobasy (208 km) boıynsha 4 merdiger uıym anyqtalǵany baıandaldy. Olarmen kelisimshartqa qol qoıylǵan. Ulytaý oblysy boıynsha jumys quny 108,6 mlrd teńge.
Bıyl jol qurylysyna jer bólý, qunarly topyraq qabatyn alý, vahtalyq qalashyqtar salý jáne karerlerdi resimdeý, sondaı-aq jol-qurylys materıaldaryn daıyndaý josparlanyp otyr.
Premer-Mınıstr «Jezqazǵan-Qyzylorda» avtojolynyń strategııalyq mańyzy bar ekenine toqtaldy. Bul óńirdiń tranzıttik áleýetin arttyrýǵa, sol arqyly oblys ekonomıkasynyń damýyna jáne turǵyndarynyń turmys deńgeıin jaqsartýǵa múmkindik beredi. Kólik mınıstrligine jumystyń ýaqytyly aıaqtalýyn qamtamasyz etý úshin máseleni erekshe baqylaýǵa alý tapsyryldy. Sondaı-aq avtojoldy rekonstrýktsııalaý kezinde merdiger uıymdardyń Ulytaý oblysynda turatyn mamandardy, sondaı-aq qajetti quzyret pen joǵary bedelge ıe kompanııalardy tartýyna nazar aýdaryldy. Jumys barysynda otandyq qurylys materıaldary paıdalanylýy tıis.
Úkimet basshysy avtojoldy rekonstrýktsııalaý jumystaryn júrgizýde jol qaýipsizdigin saqtaý qajettigine erekshe toqtaldy. Jalpy, óńirdegi jergilikti mańyzy bar joldarda qurylys jumystary qatar júrgizilýde. 2023 jyly oblysta jalpy quny 12 mlrd teńgeden asatyn 170 shaqyrymnan astam jol rekonstrýktsııalandy jáne jóndeldi. Bıyl jalpy somasy 16 mlrd teńgeden asatyn, uzyndyǵy 196 shaqyrym joldardy jóndeý jumystary jalǵasady.
Aıta keteıik, Memleket basshysynyń 2025 jylǵa deıin búkil respýblıkalyq jol jelisin normatıvtik qalypqa keltirý jónindegi tapsyrmasyn oryndaý sheńberinde Qazaqstanda 12 myń shaqyrym, atap aıtqanda, respýblıkalyq jeli boıynsha – 8 myń shaqyrym, jergilikti jeli boıynsha – 4 myń shaqyrym avtojoldyń aýqymdy qurylysy men jóndeý jumystary bastaldy. Kólik mınıstrliginiń derekteri boıynsha jyl sońyna deıin 7 myń shaqyrymda jumystar aıaqtalady.
