Oljas Bektenov jeńil ónerkásipti damytý tásilderin qaıta qaraýdy tapsyrdy
ASTANA. KAZINFORM – Premer-mınıstr Oljas Bektenov Memleket basshysynyń ekonomıkany ártaraptandyrý jáne otandyq óndiristi damytý jónindegi tapsyrmalary sheńberinde jeńil ónerkásipti damytý máseleleri boıynsha keńes ótkizdi.
Jıynǵa Ulttyq ekonomıka, Ónerkásip jáne qurylys, Aýyl sharýashylyǵy, Qarjy mınıstrlikteriniń, «Samuryq-Qazyna» UÁQ, «Atameken» UKP, «Báıterek» UKP basshylyǵy jáne t.b. qatysty.
Premer-mınıstrdiń orynbasary – ulttyq ekonomıka mınıstri Serik Jumanǵarın salanyń áleýmettik mańyzdylyǵyn atap ótip, jeńil ónerkásipte jumys isteıtinderdiń 60%-yn áıelder quraıtynyn jetkizdi.
Jıynda ónerkásip jáne qurylys mınıstri Ersaıyn Naǵaspaevtyń saladaǵy búgingi ahýal, oryn alyp otyrǵan kedergiler men damý perspektıvalary týraly baıandamasy tyńdaldy. ÓQM derekteri boıynsha 2025 jyldyń qorytyndysynda saladaǵy óndiris kólemi 260 mlrd teńgege jetken. Osy jyldyń basynan beri ónerkásiptegi óńdeýshi sektordyń ósýi 9,9%-dy quraǵan, bul rette jeńil ónerkásip óndirisiniń kólemi 2,2 esege ulǵaıǵan. Dese de salada ımporttyń joǵary úlesi saqtalýda.
Sonymen qatar daıyn ónimder shyǵarý jáne qaıta óńdeý úlesin ulǵaıtý sharalary talqylandy. Óndiristerdi jańǵyrtý, qaıta óńdeý qýatyn keńeıtý, lokalızatsııalaý deńgeıin arttyrý, kadrlar daıarlaý jáne otandyq taýar óndirýshilerdiń básekege qabilettiligin nyǵaıtý qajettiligine basa nazar aýdaryldy.
Qazaqstandyq óndirýshilerdi qoldaý máselesi óz aldyna bólek qarastyryldy. Ataýly qoldaý sharalaryn usyný maqsatynda Taýarlardy, jumystardy, kórsetiletin qyzmetterdi otandyq óndirýshilerdiń tizilimi jumys isteıdi.
«Atameken» UKP tóralqa tóraǵasy Qanat Sharlapaev qaýipsizdik normalaryna sáıkestigin baqylaý úshin arnaıy maqsattaǵy jeńil ónerkásip ónimderin sertıfıkattaý boıynsha usynystaryn aıtty.
– Qasym-Jomart Toqaev ekonomıkalyq áleýetti nyǵaıtý mindetin qoıdy. Jańa Konstıtýtsııanyń qabyldanýymen Úkimet óńdeý sektoryn damytý jumystaryn kúsheıte tústi. Bıylǵy tórt aıdyń qorytyndysy boıynsha óńdeý salasy turaqty ósim kórsetip otyr. Onyń ishinde jeńil ónerkásiptiń áleýmettik mańyzy zor. Biz otandyq taýar óndirýshilerdi qoldaý sharalaryn keńeıtýimiz qajet, - dep atap ótti Oljas Bektenov.
Keńes qorytyndysy boıynsha Premer-mınıstr qazaqstandyq óndirýshilerge ótkizý naryqtaryna shyǵýǵa kepildik bere otyryp, óndiristi ulǵaıtý úshin qosymsha yntalandyratyn model qalyptastyrý qajettigine nazar aýdardy.
Buǵan deıin Nurlybek Nálibaev East Hope Group ókilderimen kezdesý ótkizgenin jazǵan edik.
