Oljas Bektenov jemqorlyqpen kúresti kúsheıtýge baǵyttalǵan jańa zań normalaryn túsindirdi

NUR-SULTAN. QazAqparat – Jemqorlardy merziminen buryn bosatpaý týraly zań normasy qaı sanattaǵy sottalýshylarǵa qoldanylmaıdy? Bul sanat jaıly tolyǵyraq QR Sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov aıtyp berdi, dep habarlaıdy QazAqparat tilshisi.

Eske sala ketsek, jaqynda Memleket basshysy Qasym-Jomart Toqaev «Qazaqstan Respýblıkasynyń keıbir zańnamalyq aktilerine qylmystyq protseste azamattardyń quqyqtaryn qorǵaýdy jáne sybaılas jemqorlyqqa qarsy is-qımyldy kúsheıtý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıǵan bolatyn.

OKQ-daǵy baspasóz máslıhatynda Oljas Bektenov bul zań arqyly jemqorlyqtyń aýyr jáne asa aýyr túri boıynsha sottalǵan adamdardy shartty túrde ýaqytynan buryn bosatýǵa tyıym salynǵanyn atap ótti.

«Tek eki adamǵa zańnyń bul normasy qoldanylmaıdy: birinshiden, bul qylmysty áleýmettik az qamtylǵan sanattaǵy jekelegen azamattary jasasa, ekinshiden sottalýshy protsessýaldyq kelisimniń barlyq sharttaryn oryndaǵan jaǵdaıda. Keltirilgen shyǵyndy tolyq qalpyna keltirse, jaza merzimi barysynda mindetti tólemi ótelse – atalǵan sanattaǵy azamattar jazanyń belgili bir bóligin ótegennen keıin shartty túrde ýaqytynan buryn bosatylýy múmkin. Qalǵan jaǵdaılarda jemqorlyqtyń aýyr jáne asa aýyr túri boıynsha sottalǵan adamdar shartty túrde ýaqytynan buryn bosatylmaıdy», - dedi Oljas Bektenov.

Onyń aıtýynsha, jemqorlyqtyń aýyr jáne asa aýyr túrin jasaǵan azamattar sot belgilegen merzimdi tolyǵymen óteıtinin málimdedi.

«Bul jaza jemqorlyqtyń aldyn alýǵa sebep bolar degen senimdemiz. Árbir adam oılanýy kerek» - deıdi ol.