Oljas Bektenov JEK damytý máseleleri jónindegi energetıkalyq keńestiń otyrysyn ótkizdi
ASTANA. KAZINFORM – Premer-mınıstr Oljas Bektenov memlekettik organdar basshylyǵy, energetıka sektory kompanııalary jáne energetıka salasyndaǵy sarapshylardyń qatysýymen jańartylatyn energııa kózderin (JEK) damytý máselelerine arnalǵan Energetıkalyq keńestiń otyrysyn ótkizdi. Bul týraly Úkimettiń baspasóz qyzmeti málim etti.
Energetıka mınıstrliginiń málimetinshe, elimizde belgilengen qýaty 3 GVt-tan asatyn 154 JEK nysany jumys isteıdi, bul – jel, kún, gıdro jáne bıogaz elektr stansalary. 2024 jyly JEK generatsııasy saǵatyna 7,6 mlrd kVt-ny qurady. 2025 jylǵa qýaty saǵatyna 450 kVt-dan astam toǵyz JEK nysanyn iske qosý josparlanǵan.
Bul rette, energetıka vıtse-mınıstri Suńǵat Esimhanovtyń baıandamasyna sáıkes, «jasyl» energetıkany damytý boıynsha kórsetkishter belgilengen maqsattardan asyp tústi. Eger 2020 jylǵa josparlanǵan baǵdar elektr energııasyn óndirýde jalpy kólemniń 3%-yn qurasa, onda 2024 jyldyń qorytyndysy boıynsha bul kórsetkish 6,4%-ǵa jetti. Osylaısha, «Jasyl» energetıkaǵa kóshý tujyrymdamasynda bekitilgen aralyq mindetterge qol jetkizildi.
Premer-mınıstrge jel, kún, gıdro jáne bıogaz energetıkasyn qosa alǵanda, JEK-tiń árbir baǵytynyń aǵymdaǵy jaı-kúıi men damý perspektıvalary týraly baıandaldy. Aýqymdy jobalardy iske asyrý úshin halyqaralyq strategııalyq ınvestor tartý máselesine nazar aýdaryldy.
Jalpy, 2030 jylǵa deıin jıyntyq qýaty 2,3 GVt bolatyn 93 JEK jobasyn paıdalanýǵa berý josparlanýda. 2035 jylǵa deıin elektr energetıkasyn damytý jónindegi is-sharalar josparynda keminde 8,4 GVt JEK engizý kózdelgen. 2024-2027 jyldary 6,7 GVt-qa aýktsıondyq saýda-sattyq ótkizý bekitildi, onyń 3,1 GVt-tan astamy qazirdiń ózinde bólingen. 2025 jyldyń sáýirinde alǵash ret jel generatsııasynyń iri jobalary boıynsha aýktsıondyq saýda-sattyq ótkizildi.
Qazaqstanda JEK sektory josparly túrde damyp, memleket tarapynan belsendi qoldaý tabýda. Búgingi tańda JEK sektoryn qoldaý sharalary aýktsıondyq baǵa boıynsha elektr energııasyn kepildendirilgen satyp alýdy, jyl saıynǵy ındeksteýdi, jelilik alymdardan bosatýdy jáne ınvestıtsııalyq preferentsııalardy qamtıdy. Bul qolaıly ınvestıtsııalyq orta qurýǵa, jańa jobalardy damytýǵa yqpal etedi ári jalpy energııa teńgerimindegi «jasyl» energııa úlesiniń turaqty ósýin qamtamasyz etedi.
Otyrys qorytyndysy boıynsha Premer-mınıstr JEK jobalaryn qoldaýdy kúsheıtýdi tapsyrdy. Olardy engizý men iske asyrýǵa ǵylymı turǵydan kózqarastyń qajettiigi aıtyldy. Ashyq jáne boljamdy tarıftik saıasattyń mańyzdylyǵy, sonymen qatar jeke sektordyń JEK nysandaryn salý men paıdalanýǵa neǵurlym keń qatysýy úshin jaǵdaı jasaýdyń mańyzdylyǵy atap ótildi. Sondaı-aq Oljas Bektenov ınvestorlardyń kelýin jáne bastamalardy iske asyrýdy tejeıtin ákimshilik kedergilerge jol berilmeıtinin atap kórsetti.