Oljas Bektenov jazǵy Paralımpıada oıyndaryna qatysatyn qazaqstandyq sportshylarǵa memlekettik týdy tabys etti
ASTANA. KAZINFORM – Premer-Mınıstr Oljas Bektenov 2024 jylǵy XVII jazǵy Paralımpıada oıyndary qarsańynda Qazaqstan quramasy múshelerimen kezdesti.
Úkimet basshysy Paralımpıada jattyǵý ortalyǵynda elimizdiń sportshylary Para oıyndarynyń ashylý rásiminde saltanatty túrde alyp júretin Qazaqstannyń memlekettik týyn ulttyq olımpıada quramasyna tabys etti. Jarys 28 tamyz ben 8 qyrkúıek aralyǵynda Parıjde ótedi.
Oljas Bektenov ulttyq paralımpıada quramasyna tabys tiledi.
«Paralımpıada – bul jaı ǵana sport emes, bul adam boıyndaǵy qaısar rýh pen sheksiz erik-jigerdiń shynaıy kórinisi. Sizderdiń jeńiske degen qushtarlyq, beıbit kúnniń batyrlaryna tán qaharmandyq qasıetterińiz qandaı qurmetke de laıyq. Mıllıondaǵan adam janqııarlyq eńbek pen ór minezden shabyttanyp, ómirdegi qıyndyqtardy eńserýdi úırenedi. Búgin ózderińizge tabys etip otyrǵan kók týymyz – aıbyndy rýhymyz ben myzǵymas birligimizdiń, jarqyn jeńistiń nyshany. Memleket basshysy álemniń eń basty sport saıystarynda el namysyn qorǵaý mártebeli mindet ári zor jaýapkershilik ekenin aıtty. Sizder halyqaralyq arenada Qazaqstandy laıyqty dárejede tanytyp, elimizge joǵary nátıje, jańa júldemen oralatyndaryńyzǵa senimdimiz», — dep atap ótti Oljas Bektenov.
Elimizde paralımpıada sportyn damytý úshin qajetti ınfraqurylym jasalyp, jańa jabdyqtalǵan sport keshenderi ashyldy. Mamandandyrylǵan sport daıyndyq ortalyǵy, 15 sport klýby, 3 mektep jáne sportty damytý dırektsııasy jumys isteıdi. Qoldaý baǵdarlamalary engizilip, jattyqtyrýshylar korpýsy daıyndaldy.
Premer-Mınıstr ulttyq paralımpıada quramasynyń eki tý ustaýshysy – Azııa Paralımpıada oıyndarynyń júldegeri, Qazaqstan chempıonatynyń on dúrkin jeńimpazy Berik Іzmaǵanbetovke (otyryp oınaıtyn voleıbol) jáne Qazaqstan chempıonatynyń jeńimpazy Sevda Alıevaǵa (para oq atý) memlekettik týdy tabys etti.
«Búgingi kún men úshin erekshe mańyzdy. Qazaqstannyń kók týyn osyndaı joǵary deńgeıli jarystarda kóterý – úlken qurmet ári jaýapkershilik. Paralımpıada oıyndaryna qatysý – árbir sportshynyń armany. Biz, parasportshylar, ózimizdiń erik-jigerimiz ben kúsh-qýatymyzdy pash etip, Qazaqstannyń namysyn bıikte ustaýǵa barymyzdy salamyz. Bizdiń júregimizde elge degen mahabbat, patrıottyq sezim, jeńiske degen umtylys bar», — dedi Berik Іzmaǵanbetov.
«Bul jetistikke jetý úshin árqaısymyz uzaq joldan óttik, kóptegen qıyndyqty eńserdik. Biraq, sońymyzda bizge senim artqan, ár qadamymyzǵa qoldaý bildiretin tutas el turǵanyn bilemiz. Biz aıanbaı kúsh synasýǵa daıynbyz. Paralımpıada oıyndarynda Qazaqstannyń ánurany maqtanyshpen shyrqalýy úshin qoldan kelgenniń bárin jasaýǵa ýáde beremiz», — dep qosty Sevda Alıeva.
Aıta keteıik, 2024 jylǵy jazǵy Paralımpıada oıyndaryna 44 qazaqstandyq sportshy qatysady. Qazaqstan quramasy sporttyń 9 túrinen, atap aıtqanda, para júzý, para paýerlıftıng, para jeńil atletıka, para kanoe, para thekvondo, otyryp oınaıtyn voleıbol, para oq atý, para ústel tennısi jáne para dzıýdodan 33 lıtsenzııa aldy. Jalpy, 1996 jyldan búginge deıin qazaqstandyqtar jazǵy Paralımpıada oıyndarynda 7 medal jeńip aldy.
