Oljas Bektenov «Jazǵy Davos» dúnıejúzilik ekonomıkalyq forýmyna qatysty
ASTANA.KAZINFORM - Premer-mınıstr Oljas Bektenov Dalıan qalasynda (QHR) «Jazǵy Davos» dúnıejúzilik ekonomıkalyq forýmynyń jańa chempıondarynyń 17-shi jyl saıynǵy kezdesýiniń ashylý saltanatyna qatysty. Sonymen qatar Mońǵolııa Premer-mınıstrimen, Bangladesh Halyq Respýblıkasynyń Premer-mınıstrimen, sondaı-aq Dúnıejúzilik ekonomıkalyq forýmnyń Prezıdenti jáne bas dırektorymen birqatar ekijaqty kezdesý ótkizdi. Bul týraly Úkimettiń baspasóz qyzmeti habarlady.
Forým jumysyna Úkimet basshylary, iri kompanııalar men sarapshylar qoǵamdastyǵynyń ókilderi qatysty. Kún tártibi tehnologııalyq transformatsııa, ınvestıtsııalyq yntymaqtastyq, tsıfrlandyrý, JI jáne ekonomıkalyq ósýdiń jańa draıverlerin izdeý máselelerin qamtıdy.
Mońǵolııa Premer-mınıstri Nıam-Osoryn Ýchralmen kelissózder barysynda saýda-ekonomıkalyq ózara is-qımyldy damytý, ónerkásip kooperatsııasy, taý-ken metallýrgııasy jáne kólik-logıstıka salalaryndaǵy yntymaqtastyq, agroónerkásip kesheni, tsıfrlandyrý jáne jasandy ıntellekt, sondaı-aq ǵaryshtyq tehnologııalar salasyndaǵy áriptestik máseleleri talqylandy.
Mońǵolııa Prezıdenti Ýhnaagıın Hýrelsýhtyń bıyl sáýir aıynda Qazaqstanǵa jasaǵan memlekettik saparynyń qorytyndysy boıynsha qol jetkizilgen ýaǵdalastyqtardyń júzege asyrylý barysy, sondaı-aq eki el basshylary qoıǵan ózara saýda kólemin $500 mln-ǵa deıin jetkizý mindetin júzege asyrý jónindegi sharalar qaraldy.
Kelissózder qorytyndysy boıynsha Oljas Bektenov pen Nıam-Osoryn Ýchral ózara qyzyǵýshylyq týdyratyn ekonomıkanyń barlyq baǵyty boıynsha yntymaqtastyqty nyǵaıtýǵa daıyn ekenderin jetkizdi Bangladesh Halyq Respýblıkasynyń Premer-mınıstri Tarık Rahmanmen kezdesý barysynda saýda jáne ınvestıtsııa, kólik-logıstıka, tsıfrlandyrý salalaryndaǵy yntymaqtastyq máselesine nazar aýdaryldy.
Qazaqstan Premer-mınıstri Prezıdent Qasym-Jomart Toqaevtyń bastamasymen elimizde júzege asyrylyp jatqan jáne memlekettilikti nyǵaıtýǵa, «Zań men tártip» qaǵıdatyn qamtamasyz etýge, Ádiletti Qazaqstan qurýǵa baǵyttalǵan reformalar elimizdiń ornyqty ekonomıkalyq ósýine, ınvestıtsııalyq tartymdylyǵyn arttyrýǵa jáne halyqaralyq yntymaqtastyqty keńeıtýge qajetti jaǵdaı jasap otyrǵanyn atap ótti.
Kezdesý qorytyndysy boıynsha qazaq-bangladesh yntymaqtastyǵyn odan ári tereńdetýge ózara múddelilik jáne ekonomıkanyń basym salalarynda jańa birlesken jobalardy júzege asyrýǵa daıyndyq rastaldy.
World Economic Forum prezıdenti jáne bas dırektory Aloıs Tsvıngımen kelissózder barysynda tsıfrlyq transformatsııa, jasandy ıntellekt, ınvestıtsııalar tartý, adamı kapıtaldy damytý salalaryndaǵy ózara is-qımyl perspektıvalary talqylandy. Kezdesý barysynda Qazaqstannyń Dúnıejúzilik ekonomıkalyq forýmmen júıeli saraptamalyq áriptestikke kóshýge múddeliligi aıtyldy. Sondaı-aq «Báıterek» ınvestıtsııalyq holdıngi arqyly yntymaqtastyqqa qyzyǵýshylyq tanyldy.
Búgingi tańda Qazaqstanda ınvestıtsııalyq ahýaldy jetildirý jáne birlesken jobalardy júzege asyrý úshin qolaıly jaǵdaı jasaý boıynsha júıeli jumys júrgizilip jatyr. Atap aıtqanda, ınvestorlarǵa memlekettik qoldaý sharalarynyń keń aýqymy qoljetimdi. Altyn Visa arnaıy vızalyq rejımi engizilip, salyqtyq jáne kedendik preferentsııalar qoldanylady. Jobalardy súıemeldeý «bir tereze» qaǵıdaty arqyly júzege asyrylady.
Bektenov Qytaı bıznes ókilderimen iri ınvestıtsııalyq jobalardy pysyqtaǵanyn jazǵan edik.
