Oljas Bektenov «Jaıly mektep» ulttyq jobasyn iske asyrýdaǵy shıkilikterdi atady
ASTANA. KAZINFORM — jaıly mektepterdiń qurylysy Úkimettiń qatań baqylaýynda bolady. Bul týraly Úkimet otyrysynda Premer-Mınıstr Oljas Bektenov aıtty.
«Jaıly mektep» ulttyq jobasyn iske asyrýda belgili bir shıkilikter de bar ekenin atap ótken jón. Úkimettiń keńeıtilgen otyrysynda Memleket basshysy Ulttyq jobany iske asyrý barysyn, ásirese jer ýchaskelerin bólý jáne jobalyq qujattamany keshiktirý máselelerin ádil synǵa aldy. Úkimetke barlyq problemalardy tez arada joıýdy tapsyrdy», — dedi Úkimet basshysy.
Premer-Mınıstr «Samuryq-Qazyna» qorynyń tarapynan merdiger uıymdardyń jumysyna tıisti baqylaý jasalmaı otyrǵanyn basa aıtty.
«Sonymen qatar, jekelegen óńirlerde áli kúnge deıin jer ýchaskelerin rásimdeý jáne ınjenerlik-kommýnıkatsııalyq ınfraqurylymmen qamtamasyz etý máseleleri sheshilmeı keledi. Óńir ákimderi tarapynan oryn alyp otyrǵan formalızm men máseleni ortalyqqa ysyra salý áreketi jobalaý jáne qurylys jumystarynyń keshigýine ákep soqtyrýda», — dedi ol.
Premer-Mınıstrdiń aıtýynsha, sondyqtan obektiler ýaqytynda tapsyrylmaı qala ma degen qaýip te joq emes.
«Qurylys materıaldaryn, jabdyqtar men jıhazdardy satyp alý isine barynsha otandyq óndirýshilerdi tartý qajet. Árbir basshynyń tikeleı esine salamyn — jaıly mektepterdiń qurylysy Úkimettiń qatań baqylaýynda bolady», — dedi Oljas Bektenov.
