Oljas Bektenov: Jańa Konstıtýtsııa jobasy — bolashaqqa baǵdarlanǵan progressıvti qujat
ASTANA. KAZINFORM – Premer-mınıstr Oljas Bektenov Ulttyq ǵylym akademııasy músheleri, memlekettik organdar basshylyǵy, birqatar oblys ákimderi jáne bıznes-qoǵamdastyq ókilderiniń qatysýymen ǵylym máseleleri, ǵylymı jobalardy júzege asyrý jáne Ulttyq ǵylym akademııasynyń áleýetin ekonomıkanyń túrli salasyn damytýǵa tartý máseleleri boıynsha keńes ótkizdi.
Prezıdenttiń ekonomıka salalaryn tsıfrlyq transformatsııalaý jónindegi tapsyrmasyn oryndaý aıasynda ǵylym men naqty sektor kooperatsııasyn nyǵaıtý, sondaı-aq ǵalymdardy qoldaý sharalary talqylandy.
Jıyndy ashqan Premer-mınıstr jańa Konstıtýtsııa jobasyn ashyq ári naqty túsindirýdiń mańyzdylyǵyna toqtaldy. Qujatta qoǵamda bolyp jatqan josparly saıası jáne ekonomıkalyq ózgeristerdi kórsetilip, el damýynyń jańa baǵdarlary, onyń ishinde bilim, ǵylym jáne ınnovatsııa salasyndaǵy basymdyqtar belgilengeni atap ótildi.
— Ata Zańnyń jańa jobasy — bolashaqqa baǵdarlanǵan progressıvti qujat. Onda adam jáne onyń quqyqtary men bostandyqtary memlekettiń negizgi basymdyǵy retinde jarııa etildi. Biz Konstıtýtsııa jobasynda Prezıdent Qasym-Jomart Kemeluly Toqaevtyń «Zań men tártip» jappaı ústemdik qurǵan, «Ádiletti ári taza Qazaqstandy qurý» ıdeıasy halyqtyń keń qoldaýyna ıe bolǵanyn kórip otyrmyz. Jaýapty ári jasampaz otanshyldyq ıdeıasy basty orynǵa qoıylady. «Kúshti Prezıdent — yqpaldy Parlament — esep beretin Úkimet» tujyrymdamasy saıası júıeniń turaqtylyǵy men sabaqtastyǵyn ornyqtyra túsedi, — dep atap ótti Oljas Bektenov.
Jahandyq deńgeıdegi ózgerister men joǵary tehnologııanyń qarqyndy damýy jáne «orta derjavalar» róliniń artýy jaǵdaıynda konstıtýtsııalyq reformanyń zaman talabyna saı ýaqtyly jasalǵan qadam ekeni basa aıtyldy. Talqylaý barysynda ǵylymı ortanyń ókilderi jańa Konstıtýtsııa jobasyn qoldap pikir bildirdi. Ǵylymdy memlekettiń turaqty damýynyń negizi retinde shoǵyrlantyrý jónindegi bastamalar erekshe atap ótildi.
— Jańa Konstıtýtsııa jobasy adam quqyǵy men bostandyǵyn memlekettiń basty basymdyǵy retinde bekitip qana qoımaı, Qazaqstannyń uzaqmerzimdi ǵylymı-tehnologııalyq damýynyń negizi sanalady, — dep atap ótti Ulttyq ǵylym akademııasynyń prezıdenti Aqylbek Kúrishbaev.
— Búgingi tańda medıtsına ǵylymynyń damýy — ǵylymı progress qana emes, sonymen qatar ulttyq qaýipsizdik pen ornyqty densaýlyq saqtaý júıesin nyǵaıtýdyń negizgi faktory. Konstıtýtsııanyń jańa jobasynda ǵylymdy memlekettiń turaqty damýynyń negizi retinde qarastyrý asa mańyzdy ekeni sózsiz. Bul ǵylymı bilim men zertteýlerdiń jáne ǵylymı kadrlardyń elimizdiń qosalqy emes, tikeleı strategııalyq resýrsy ekenin moıyndaýdy bildiredi, — dedi akademık Vıacheslav Lokshın «ómir jáne densaýlyq týraly ǵylym» baǵytyn strategııalyq deńgeıge shyǵarý qajettiligin atap ótip.
Osyǵan baılanysty jasandy ıntellekt jáne úlken derekter bazasynda sheshimderdi engizý, tsıfrlyq dıagnostıka men telemedıtsınany damytý, medıtsına ǵylymynyń kadrlyq áleýetin nyǵaıtý máseleleri de kún tártibinde ózekti bola tústi.
Aıta ketelik Bektenov jańa Konstıtýtsııa jobasyn halyqqa jan-jaqty túsindirý jumystaryn kúsheıtýdi tapsyrǵan edi.