Oljas Bektenov vegetatsııalyq kezeńde sý táýekelderin basqarý jónindegi óńirlik shtabtar qurýdy tapsyrdy
ASTANA. KAZINFORM — Premer-mınıstr Oljas Bektenov vegetatsııalyq kezeńdi ótkizý máselesi boıynsha keńes ótkizdi. Bul týraly Úkimettiń baspasóz qyzmeti málim etti.
Onda elimiz boıynsha, sondaı-aq sý tutynýdyń 97%-yn quraıtyn ońtústik óńirlerdiń ahýaly, sonymen qatar aýyl sharýashylyǵynda egis qurylymyn qazirgi jaǵdaıǵa beıimdeý jáne ylǵaldy az qajet etetin daqyldarǵa kóshý, sý únemdeý tehnologııalaryn engizý boıynsha aýyl sharýashylyǵynda qabyldanyp jatqan sharalar qaraldy.
Sý resýrstary jáne ırrıgatsııa mınıstri Nurjan Nurjigitovtiń, Túrkistan, Jambyl, Qyzylorda, Almaty jáne Jetisý oblystary ákimderiniń baıandamasy tyńdaldy.
QR Sý resýrstary jáne ırrıgatsııa mınıstrliginiń málimeti boıynsha, «Qazsýshar» RMK fılıaldary aýyl sharýashylyǵy óndirýshilerine sý berýdi uıymdastyrdy. Búginde 22,5 myń kelisimshart jasaldy, bul ótken jyldyń sáıkes kórsetkishinen 3 myńǵa artyq.
Talqylaý barysynda Shý, Talas jáne Syrdarııa ózenderindegi jaǵdaı, sýdy bólýdegi ashyqtyqty qamtamasyz etý máselelerine nazar aýdaryldy. Sý únemdeýdi yntalandyrý maqsatynda elimizde egindik sýǵa arnalǵan sýbsıdııalardyń saralanǵan mólsheri engizildi: sý únemdeý tehnologııalaryn paıdalanatyn sharýalar úshin mundaı tehnologııalardy qoldanbaıtyndarǵa qaraǵanda – sýbsıdııalar mólsheri joǵary. Sonymen qatar sýdy zańsyz paıdalanýmen kúresý jáne sý urlaý faktileriniń aldyn alý sharalary qabyldanbaq.
Premer-mınıstr sharýalardyń qajettilikterin sý resýrstarymen qamtamasyz etý jáne aýyl sharýashylyǵynyń suranystaryn qanaǵattandyrý kóbirek nazar aýdarýdy talap etetinin atap ótti.
—Tıimdilikke, únemdilikke jáne vedomstvoaralyq kelisimdilikke basa nazar aýdara otyryp, sý táýekelderin aldyn ala basqarýǵa kóshý qajet. Oblys ákimderi sýmen jabdyqtaý uıymdarynyń egindik sýmen sharýalardy qamtamasyz etý, sýarý tehnologııalaryn saqtaý, sýarý rettiligi jáne kollektorlyq-drenajdyq sýdy qaıta paıdalaný jónindegi is-qımyldaryn úılestirýdi qamtamasyz etýi tıis. Sý únemdeý tehnologııalaryn engizý jumystaryn kúsheıtý qajet. Múddeli memlekettik organdar men fermerler birlestikteri ókilderiniń qatysýymen vegetatsııalyq kezeńde sý táýekelderin basqarý jónindegi óńirlik shtabtar qurýdy tapsyramyn. Sýdy zańsyz paıdalanýdy baqylaýdy kúsheıtý jáne buzýshylyqtardy anyqtaý jumystaryn jandandyrý mańyzdy, — dep atap ótti Oljas Bektenov.
Sý resýrstary jáne ırrıgatsııa mınıstrligine kórshiles eldermen transshekaralyq ózender boıynsha yntymaqtastyqty nyǵaıtý, sý berý lımıtterin baqylaýdy kúsheıtý jáne jedel áreket etý, qurylystarǵa jóndeý júrgizý tapsyryldy.
Sondaı-aq spýtnık derekterin paıdalana otyryp jáne ınteraktıvti kartalarda sý tapshy aımaqtardy kórsetý arqyly sýdy paıdalanýdyń tsıfrlyq monıtorıngin engizýdi qamtamasyz etý qajet.
Úkimet sharýalardy sýmen qamtamasyz etý úshin qajetti sharalar qabyldaýda, vegetatsııalyq kezeńniń ótý barysy turaqty baqylaýda. Atalǵan jumysty úılestirý Premer-mınıstrdiń orynbasary Qanat Bozymbaevqa júkteldi.
Eske sala keteıik, buǵan deıin Qazaqstanda shamamen 85 myń gektar jer sý únemdeý tehnologııasymen sýarylatynyn jazǵan edik.