Oljas Bektenov vedomstvolarǵa drondyq logıstıkany damytýǵa qatysty tapsyrma berdi
ASTANA. KAZINFORM — Ónerkásip mınıstrligi tsıfrlyq sheshimderdiń búkil salada keńinen qoldanylýyn qamtamasyz etýi tıis. Bul týraly Úkimet otyrysynda Premer-mınıstri Oljas Bektenov málim etti.
- Ónerkásiptiń tsıfrlyq transformatsııasy da birkelki emes jáne ázirge jekelegen iri kásiporyndarda ǵana shoǵyrlanǵan. Ónerkásip mınıstrligi tsıfrlyq sheshimderdiń búkil salada keńinen qoldanylýyn qamtamasyz etsin. Ol úshin negizgi óndiristik derekterdi biryńǵaı salalyq «Data Lake» júıesine biriktirý qajet. Atalǵan máseleler jasandy ıntellektini engizýdiń negizine aınalýǵa tıis. Tsıfrlandyrý kásiporyndarǵa eńbek ónimdiligin kóterý, shyǵyndardy azaıtý jáne básekege qabilettilikti arttyrý sııaqty naqty nátıje ákelýi kerek, - dedi J.Mádıev.
Úkimet basshysy Qazaqstanda robotty tehnıkalyq júıelerdi óndiretin alǵashqy Qazbot kesheniniń qurylysy bastalǵanyn eske saldy.
- Drondyq logıstıka damyp keledi. Biz úshin mundaı jobalardyń jekelegen bastamalar deńgeıinde qalyp qoımaı, turaqty ishki suranysqa ıe bolǵany mańyzdy. Memleket pen ulttyq kompanııalardyń suranysyn aldyn ala aıqyndap, otandyq óndirýshilerge uzaq merzimdi kepildi kelisimsharttar usyný qajet. Bul kásiporyndarǵa jumysty aldyn ala josparlaýǵa jáne óndiristik qýattar men lokalızatsııa deńgeıin júıeli túrde arttyrýǵa múmkindik beredi. Ónerkásip mınıstrligi eki aı merzimde otandyq tsıfrlyq sheshimderdi birinshi kezekte engizý úshin basymdyq beriletin kásiporyndar men tehnologııalyq protsesterdiń tizbesin aıqyndasyn. Sondaı-aq múddeli memlekettik organdarmen jáne ulttyq kompanııalarmen birlesip, otandyq robotty tehnıkalarǵa jáne pılotsyz sheshimderge uzaq merzimdi suranysty qalyptastyrý qajet, - dedi Premer-mınıstr.
Buǵan deıin habarlanǵandaı, qalalyq servısterdi basqarý boıynsha Astana tájirıbesi el óńirlerinde engiziledi.
