Oljas Bektenov Úkimet jumysynyń basty baǵdaryn atady
ASTANA. KAZINFORM — Zań men tártip qaǵıdaty Úkimet jumysynyń basty baǵdarynyń biri bolady. Bul týraly búgin Quryltaıdyń jalpy otyrysynda Premer-mınıstr Oljas Bektenov aıtty.
Oljas Bektenov aldymen joǵary senim kórsetip, ekinshi márte Premer-mınıstr laýazymyna taǵaıyndaǵan Prezıdentke, sondaı-aq qoldaý kórsetken birinshi shaqyrylymdaǵy Quryltaı depýtattaryna alǵysyn bildirdi.
— Bizdiń ózara birlesken jumysymyz Memleket basshysynyń «Ádiletti ári qýatty Qazaqstandy qurý» mindetin jedel jáne sapaly oryndaýǵa baǵyttalady dep senemin. Jańa Konstıtýtsııamyz qabyldanyp, memleketimizdiń saıası júıesiniń jańarý úderisi bastaý alǵan el damýynyń asa mańyzdy kezeńinde Úkimetti basqarý men úshin aıryqsha jaýapkershilik. Prezıdent myrza, jyl qorytyndysy boıynsha ekonomıkanyń keminde 5 paıyz deńgeıinde ósýin qamtamasyz etemiz. Bul oraıda azamattardy belsendi jumyspen qamtý arqyly olardyń tabysynyń ósýin yntalandyra otyryp, ınflıatsııanyń deńgeıin tómendetemiz, — dedi Oljas Bektenov.
Úkimet basshysy búkil elimiz boıynsha mańyzdy jobalardyń qurylysy bastalǵanyn aıtty.
— Aýqymdy qurylys baǵdarlamasy ınfraqurylymdyq jáne áleýmettik nysandardy ozyq qarqynmen salýǵa jáne ekonomıkalyq ósimdi yntalandyrýǵa baǵyttalady. 2026 jyl «Tsıfrlandyrý jáne jasandy ıntellekt jyly» bolyp belgilendi. Tapsyrmalardy jedel ári sapaly oryndaýymyz úshin bar kúsh-jigerimizdi salamyz. Ekonomıkanyń barlyq salasynda tsıfrlyq transformatsııa jalǵasyn tabady. Sonymen qatar, zań men tártip qaǵıdaty Úkimet jumysynyń basty baǵdarynyń biri bolady, — dedi Oljas Bektenov.
Aıta keteıik, Quryltaı otyrysynda depýtattar Vıtse-Prezıdent laýazymyna usynylǵan Erlan Qarınniń kandıdatýrasyn qoldady.
Sonymen qatar Oljas Bektenovtiń Premer-mınıstr laýazymyna taǵaıyndalýyna kelisim berdi.
