Oljas Bektenov. Úkimet pen Ulttyq bank ınflıatsııany tejeý josparyn ázirlep jatyr
ASTANA. KAZINFORM — Premer-mınıstr Oljas Bektenov Májilistiń jalpy otyrysynda aldaǵy úsh jyldaǵy ekonomıkalyq ósim kórsetkishi bıylǵy kórsetkishten nege tómen belgilengen túsindirdi.
— Qaralyp otyrǵan bıýdjet jobasynda ekonomıkanyń ósý qarqyny 5 paıyz dep belgilengen. Bul bıylǵy 6 paıyzdyq ósim qarqynynan tómen. Muny 2025 jyldyń joǵary bazasymen baılanystyrýǵa bolatyn shyǵar. Degenmen ekonomıkanyń ósimi qazirdiń ózinde shegine jaqyn. Aldaǵy úsh jylǵa josparlanǵan ekonomıkanyń ósý qarqynyń tómendeýine qandaı faktorlar áser etti, — dep surady depýtat Berik Beısenǵalıev.
Premer-mınıstr Oljas Bektenov bul Úkimettiń konservatıvti boljamdarymen baılanysty ekenin aıtady.
— Rasynda da bıýdjetti josparlaý kezinde biz konservatıvti tásil qoldanamyz. Sońǵy úsh jylda ekonomıkamyz turaqty ósip kele jatyr. 2023 jyly 5,1 paıyz bolsa, byltyr 5 paıyzben óstik. Bıyl ósý qarqyny joǵary bolyp tur. Biraq jalpy álemdegi ahýaldy qaraıtyn bolsaq, álemdik ekonomkanyń ortasha ósimi 3 paıyz bolyp tur. Al bizge óte mańyzdy iri kórshilerimizdiń ekonomıkalary da baý ósip jatyr. Sondyqtan biz Úkimet tarapynan turaqty, qarqyndy ekonomıkalyq ósimdi qamtamasyz etý úshin bar kúshimizdi salyp jatyrmyz. «Báıterek» holdıngi arqyly aýqymdy baǵdarlama iske qosyldy. Jalpy mólsheri — 8 trln teńge, — degen Úkimet basshysy atalǵan qarajat mańyzdy ınvestıtsııalyq jobalarǵa salynyp jatqanyn atap ótti.
Sondaı-aq, ol qazirgi ınflıatsııa deńgeıi Qazaqstan ekonomıkasyna aýyrtpalyq túsirip turǵanyn moıyndady.
— Bizge makroekonomıkalyq turaqtylyq óte mańyzdy. Birinshi kezekte ınflıatsııany tejeý kerek. Qyrkúıektiń qorytyndysy boıynsha ınflıatsııanyń deńgeıi 12,9 paıyz boldy. Ol bizdiń pikirimizshe, tym joǵary kórsetkish. Ony tómendetý kerek. Osy baǵytta Ulttyq bankpen birlesip, tıisti sharalar josparyn daıyndap jatyrmyz. Daıyn bolǵan soń jaqyn arada halyqqa jarııalaımyz. Osy barlyq faktorlardy esepke alsaq, josparlanǵan ósý kórsetkishteri durys, teńgerimdi dep oılaımyz, — dedi Premer-mınıstr.
Osy otyrysta Premer-mınıstrdiń orynbasary — Ulttyq ekonomıka mınıstri Serik Jumanǵarın eldiń 2026 — 2028 jyldarǵa arnalǵan áleýmettik-ekonomıkalyq damý boljamyn tanystyrdy.