Oljas Bektenov Túrkistan oblysynda «Móldir bulaq» aktsııasyna qatysty
ASTANA. KAZINFORM – Premer-mınıstr Oljas Bektenov Prezıdenttiń «Taza Qazaqstan» bastamasy aıasynda Túrkistan oblysy Saıram aýdany Aqbulaq aýylyndaǵy «Aq-Ata» bulaǵyn tazartý jáne abattandyrý is-sharalaryna qatysty. Bul týraly Úkimettiń baspasóz qyzmeti habarlady.
Jergilikti turǵyndarmen, belsendilermen birlesip, bulaq kózin tazartý, aınalasyn abattandyrý, aǵash kóshetterin otyrǵyzý jumystary júrgizildi. Bulaqtyń jalpy aýdany 3,5 gektar. Atalǵan bulaqtyń tarıhy XVII–XVIII ǵasyrlardan bastalady.
Túrkistan oblysy ákiminiń orynbasary Nurbol Turashbekov aldaǵy ýaqytta óńir boıynsha 1,5 myńǵa jýyq bulaq kózin tazartý josparlanyp otyrǵanyn aıtty.
Jalpy, «Móldir bulaq» aýqymdy ekologııalyq aktsııasy bıyl 23 naýryzda bastaldy. Birinshi kezeńde tazartý jáne abattandyrý jumystary elimizdiń alty óńirinde – Túrkistan, Jambyl, Qyzylorda, Almaty, Jetisý oblystarynda jáne Shymkent qalasynda ornalasqan 29 bulaqty qamtıdy. Ekinshi kezeń osy jyldyń sáýir aıyna josparlanǵan jáne elimizdiń qalǵan óńirlerinde ótkiziledi. Onyń aıasynda bulaq kózin ashý, sý jınaý, tazartý jáne abattandyrý, irgeles aýmaqtardy tazalaý, qoqystar shyǵarý, sondaı-aq halyqtyń ekologııalyq mádenıeti men sý resýrstaryn tıimdi paıdalaný jónindegi saýattylyǵyn arttyrýǵa baǵyttalǵan is-sharalar júrgiziledi.
Búginde ekologııalyq is-sharalarǵa 3,8 myńnan astam adam tartylǵan. Oǵan jastardyń qatysýyna erekshe mán berilip otyr. Bul óz kezeginde ekologııalyq mádenıetti qalyptastyrýǵa, sý resýrstaryna uqypty qaraýǵa jáne óskeleń urpaqty tabıǵat qorǵaý isine keńinen tartýǵa yqpal etedi.
QR Sý resýrstary jáne ırrıgatsııa mınıstrliginiń derekteri boıynsha, sý resýrstaryn saqtaý jáne utymdy paıdalaný jumystary júıeli túrde júrgizilip keledi. Bulaqtar sý tapshylyǵy jaǵdaıynda sýmen qamtamasyz etýdiń qosymsha kózi retinde qarastyrylady. «Qazgıdrogeologııa» ulttyq gıdrogeologııalyq qyzmeti bulaqtardy túgendeý jumystaryn júrgizedi: aldyn ala derekter boıynsha 711 bulaq kózi anyqtaldy, sondaı-aq muraǵat materıaldary boıynsha 2772 bulaq kartasy jasaldy.
Jalpy, ekologııalyq bastamalardy júzege asyrý sýdyń tabıǵı kózderin saqtaýǵa, halyqtyń ekologııalyq mádenıetin arttyrýǵa jáne sý resýrstaryna uqypty qaraýǵa baǵyttalǵan.
– Memleket basshysynyń tabıǵatqa uqypty qaraý jónindegi bastamasy azamattardyń qoldaýynyń arqasynda Konstıtýtsııa deńgeıinde tıisti quqyqtyq turǵyda bekitildi. Memlekettiń mindeti – adamnyń ómiri men densaýlyǵyna qolaıly qorshaǵan ortany qalyptastyrý. «Taza Qazaqstan» bastamasy qoǵam men memlekettiń kúsh-jigerin biriktire otyryp, jalpyulttyq qozǵalysqa aınaldy. Bul — nátıjeli, jasampaz patrıotızmniń aıqyn úlgisi. Búgingi tańda aktsııa tek senbiliktermen jáne aǵash otyrǵyzýmen shektelmeıdi. «Móldir bulaq» bastamasy tabıǵı bulaqtar men sý aıdyndaryn qamtı otyryp, aıasyn keńeıtýde, sondaı-aq sý resýrstaryn utymdy paıdalaný máselesiniń mańyzyn jalpy qoǵamdyq deńgeıde kóterip otyr, - dep atap ótti Oljas Bektenov.
Aıta keteıik, Bektenov Túrkistan oblysynda salynyp jatqan elektr stansasynyń qurylysyn tekserdi.
