Oljas Bektenov turǵyn úı sektorynda órttiń jıileýine alańdaýshylyq tanytty
ASTANA. KAZINFORM – Jylý berý maýsymynyń bastalýymen turǵyn úı sektorynda órt oqıǵalarynyń sany ósip barady. Bul týraly Úkimet otyrysynda Premer-mınıstr Oljas Bektenov aıtty.
- Jalpy, jylý berý maýsymynyń bastalýymen turǵyn úı sektorynda órt oqıǵalarynyń sany ósip barady. Biz bul máseleni qazan aıynda Úkimet otyrysynda qaradyq. Alaıda, jaǵdaıdyń jaqsarǵanyn ázirge kórip otyrǵan joqpyz. Sondyqtan aldyn alý jáne túsindirý jumystaryn kúsheıtý qajet, - dedi Úkimet basshysy.
Osy oraıda Premer-mınıstr Tótenshe jaǵdaılar mınıstrligine órtterdi boldyrmaýdy, adamdardyń ómirin saqtaý máseleleri boıynsha ortalyq jáne jergilikti memlekettik organdardyń jumysyn tıisti deńgeıde úılestirýdi qamtamasyz etýdi tapsyrdy.
- Óńir ákimdikterimen jáne Іshki ister mınıstrligimen birlesip, turǵyn úı sektoryn, ásirese jataqhanalar men hostelderdi, halyqtyń áleýmettik osal toptarynyń úılerin aralap, reıdter júrgizý qajet. Mádenıet mınıstrligi men ákimdikter barlyq mass-medıa men áleýmettik jelilerde túsindirý jumystaryn jandandyrsyn. Óńir ákimdikteri gaz jabdyqtaryn qaýipsiz paıdalanýǵa baǵyttalǵan aldyn alý sharalaryn júrgizý boıynsha gaz-tehnıkalyq ınspektsııanyń jumysyn kúsheıtsin. Oryn alǵan jaǵdaıdan durys qorytyndy shyǵaryp, aldaǵy ýaqytta ondaı oqıǵalarǵa jol bermeý úshin naqty usynystar ázirleý kerek, - dedi Oljas Bektenov.
Keshe tańerteń Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy.
Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty.
Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.
Búgin Úkimet otyrysynda Premer-mınıstr Oljas Bektenov Túrkistan oblysy Jetisaı aýdany Alǵabas aýylynda órtten qaza tapqandardyń týystaryna kóńil aıtty.
Al vıtse-premer Qanat Bozymbaev órttiń qylmystyq quramy joq ekenin atap ótti.