Oljas Bektenov tún ishinde turǵyndar tynyshtyǵyn buzatyn moto jáne avtokólik ıelerin qamaýǵa alýdy tapsyrdy
ASTANA. KAZINFORM — Tún ishinde qatty shýyldaıtyn moto jáne avtokólikpen júretin azamattarǵa jaza qatańdatylady. Búgin Úkimet otyrysynda Premer-mınıstr Oljas Bektenov Іshki ister mınıstrine osyndaı tapsyrma berdi.
— Myna qatty shýyldaıtyn moto jáne avtokólik máselesin biz birneshe ret ózińizben talqyladyq. Olarǵa óte qatań sharalar qabyldaý kerek. Áıtpese túnniń ortasynda adamdardyń mazasyn alyp, uıqy bermeı jatyr. Qandaı jumystar atqaryp jatyrsyzdar? , — dep surady Oljas Bektenov mınıstrden.
Mınıstr mundaı faktilerdiń bar ekenin jasyrǵan joq.
— Polıtsııa táýlik boıy jumys isteıdi. Búginde tsıfrlyq sheshimder, kameralar oǵan kóp kómektesýde, kameralarmen anyqtaımyz. Jalpy, qoǵam qazir belsendilikti arttyryp jatyr. Adamdar ózderi telefon arqyly shalyp, 102-ge osyndaı málimetterdi habarlaıdy. Jyl basynan beri osyndaı 372 fakti oryn aldy. Olardyń bári ákimshilik jaýapkershilikke tartyldy, 55-i qamaqqa alyndy. Avtokólikter, mototsıklder aıyppul turaqtaryna qoıylady, — dedi ol.
Sonymen qatar Erjan Sádenov osy baǵyttaǵy jumys kúsheıtiletinin atap ótti.
— Olarǵa aıyppul emes, qamaý kerek, — dedi osy oraıda Premer-mınıstr Oljas Bektenov.
Aıta keteıik, otyrysta jol qozǵalysy qaýipsizdigin qamtamasyz etý máselesi qaralyp, jylý berý maýsymyna daıyndyq barysy pysyqtalyp jatyr.
