Oljas Bektenov Tubacex Group kompanııasynyń vıtse-prezıdentimen kezdesti

ASTANA. KAZINFORM – Memleket basshysy Qasym-Jomart Toqaevtyń el ekonomıkasyna tikeleı sheteldik ınvestıtsııalar tartý boıynsha alǵa qoıǵan mindetterin júzege asyrý aıasynda Úkimet basym salalardaǵy yntymaqtastyq boıynsha ınvestorlarmen tyǵyz ózara is-qımyl júrgizip jatyr. Búgin Premer-mınıstr Oljas Bektenov ıspandyq Tubacex Group kompanııasynyń vıtse-prezıdenti Anton Azlormen kezdesý ótkizdi.

Basqosý barysynda ónerkásip salasyndaǵy yntymaqtastyq keleshegi, atap aıtqanda joǵary tehnologııaly jańa óndiristerdi engizý máseleleri talqylandy. Jiksiz qubyrlardy qosa alǵanda, munaı-gaz salasynda suranysqa ıe ónimder shyǵarýǵa nazar aýdaryldy. 

Sheteldik ınvestor Atyraý oblysynda tot baspaıtyn bolattan jáne nıkel qorytpalarynan jasalǵan jiksiz qubyrlar shyǵaratyn Ortalyq Azııadaǵy alǵashqy zaýytty salý jobasyn usyndy. Jobalyq qýaty – 12 myń tonna daıyn ónim.

Sonymen qatar zamanaýı munaı-gaz mashınasyn jasaý zaýytyn ashýdyń keleshegi talqylandy. QR Úkimeti qosylǵan quny joǵary ónim shyǵarý boıynsha óndirister ashýǵa basa nazar aýdara otyryp, ónerkásip sektoryna ınvestorlar tartýǵa múddeli.

Kezdesý sońynda taraptar ári qaraı ashyq jáne syndarly dıalogke daıyn ekenderin jetkizdi. Tıisti memlekettik organdarǵa jobany odan ári júzege asyrý úshin pysyqtaýǵa járdem kórsetý tapsyryldy.

Eske sala keteıik, buǵan deıin Úkimet nemis ınvestorlarymen birge Jetisýda halyqaralyq áýejaı salatynyn jazǵan edik.