Oljas Bektenov tsıfrlyq teńgeniń qoldaný aıasyn keńeıtýdi tapsyrdy
ASTANA. KAZINFORM — Tsıfrlyq teńge tsıfrlyq qarjy servısterin damytý quralyna aınala alady. Bul týraly Úkimet otyrysynda Premer-mınıstr Oljas Bektenov málim etti.
- Tokenızatsııa naryǵy men krıptoındýstrııanyń belsendi damýy aıasynda alaıaqtyqtyń jańa túrleri paıda bolýda. Osy aıda Qarjylyq monıtorıng agenttigi krıptovalıýta túrinde shaǵyn nesıe berý degen jeleýmen júrgizilgen zańsyz árekettiń jolyn kesti. Ýákiletti organdar aldaǵy ýaqytta da azamattardy tsıfrlyq ortada qorǵaýdy qamtamasyz etýi qajet. Buǵan jańa Konstıtýtsııada kepildik berilgen, - dedi O. Bektenov.
Onyń aıtýynsha, Jasandy ıntellekt mınıstrligi Ulttyq bankpen birlesip, kıberqaýipsizdikti qamtamasyz etý jáne osy saladaǵy zańnamany jetildirý baǵytynda belsendi jumys júrgizýge tıis.
- Sonymen qatar asa mańyzdy baǵyttardyń biri – tsıfrlyq teńgeni qoldanysqa engizý. Bul joba tólem ınfraqurylymyn jańǵyrtý jáne qarjy júıesiniń tıimdiligin arttyrý quraly retinde júzege asyrylýda. Tsıfrlyq teńgeniń krıptovalıýtalardan aıyrmashylyǵy, ol – Ulttyq bank shyǵaratyn ortalyqtandyrylǵan tsıfrlyq valıýta, ıaǵnı zańdy tólem quraly. Sondyqtan memlekettik shyǵystardyń tıimdiligin arttyrý tsıfrlyq teńgeni qoldanýdyń mańyzdy nátıjesi bolýǵa tıis. Tsıfrlyq teńge tsıfrlyq qarjy servısterin damytý quralyna aınala alady. Tsıfrlyq sharttardy bekitý múmkindigi memlekettik satyp alýlar men korporatıvtik operatsııalarda esep aıyrysý úderisterin avtomattandyrýǵa jol ashady. Qarjy mınıstrligi Ulttyq bankpen jáne basqa da múddeli taraptarmen birlesip, tsıfrlyq teńgeni qoldaný aıasyn keńeıtý úshin barlyq qajetti sharalardy pysyqtaýy qajet, - dedi Úkimet basshysy.
Budan buryn habarlanǵandaı, elimizde 76 lıtsenzııalanǵan maıner bar.
