Oljas Bektenov temir jol jobalaryn ýaqytyly paıdalanýǵa berýdi tapsyrdy

ASTANA. KAZINFORM — «Shyǵys — Batys» baǵyty boıynsha temir jolmen tranzıttik tasymal kólemin arttyrý qajet. Bul týraly Úkimet otyrysynda Premer-mınıstr Oljas Bektenov aıtty. 

— Memleket basshysy Qazaqstannyń kólik-tranzıttik áleýetin damytý boıynsha naqty mindetter qoıdy. Temirjol tasymaly naryǵy jyl ótken saıyn básekege qabiletti bolyp keledi. Osy rette, tranzıttik hab retinde pozıtsııamyzdy nyǵaıtý úshin biz ınfraqurylymnyń múmkindikterin belsendi túrde arttyrýymyz qajet. «Osal tustardy», atap aıtqanda shekara mańyndaǵy aýdandardaǵy talapqa saı kelmeıtin jerlerdi retke keltirý qajet. Tranzıttik tasymaldaý kólemin, ásirese «Shyǵys — Batys» baǵyty boıynsha arttyra túsý kerek, — dedi Úkimet basshysy.

Premer-mınıstrdiń aıtýynsha, bıyl «Dostyq — Moıynty» jáne «Almaty qalasynyń aınalma joly» sııaqty iri jobalardy iske asyrý aıaqtalady. «Darbaza — Maqtaaral», «Baqty — Aıagóz» temirjol jelileri salynýda. Bul jobalardy belgilengen merzimde aıaqtaý qajet. Onyń barlyǵy kúrdeli ýchaskeler men iri túıispeli toraptar jelisiniń júktemesin azaıtyp qana qoımaı, júkterdiń tranzıtin de edáýir arttyrýǵa múmkindik beredi.

— Memleket basshysynyń tapsyrmasy boıynsha «Moıynty — Qyzyljar», «Altynkól — Jetigen», «Beıneý — Mańǵystaý» ýchaskeleriniń qurylysy men olardy jańǵyrtý jumystary bastaldy. Atalǵan jobalar elimizdiń ótkizý qabiletin arttyrýǵa baǵyttalyp otyr. Olarǵa baqylaýdy kúsheıtip, ýaqtyly paıdalanýǵa berý qajet. Avtomattandyrylǵan basqarý júıelerin engizý, tsıfrlyq dıspetcherleý, aqparattyq júıelerdi ıntegratsııalaý esebinen salany tsıfrlandyrýǵa da basa kóńil bólinýde, — dedi Oljas Bektenov.

Bıyl «Stadler Qazaqstan» zaýytynyń 51 vagony paıdalanýǵa beriletinin jazǵan edik.