Oljas Bektenov Tashkent forýmynda Qazaqstannyń ınvestıtsııalyq múmkindikterin tanystyrdy
ASTANA. KAZINFORM -Qazaqstan Respýblıkasynyń Premer-mınıstri Oljas Bektenov V Tashkent halyqaralyq ınvestıtsııalyq forýmyna qatysyp, Ózbekstan Respýblıkasynyń Prezıdenti Shavkat Mırzıeevtiń qabyldaýynda boldy, dep habarlaıdy Úkimettiń baspasóz qyzmeti.
Kezdesý barysynda Oljas Bektenov Qazaqstan Respýblıkasynyń Prezıdenti Qasym-Jomart Toqaevtyń jyly lebizi men izgi tilegin jetkizdi. Eki el arasyndaǵy ózara is-qımyl senimge, ózara túsinistikke jáne baýyrlas halyqtar arasyndaǵy berik dostyqqa negizdelgen strategııalyq áriptestik pen odaqtastyqtyń jarqyn úlgisi ekeni atap ótildi. Eki memlekettiń basshylary qol jetkizgen ýaǵdalastyqtardyń kópjosparly yntymaqtastyqty odan ári damytýǵa tyń serpin berip otyrǵany aıtyldy.
2025 jyldyń qorytyndysy boıynsha Qazaqstan men Ózbekstan arasyndaǵy ózara saýda kólemi 16,2%-ǵa artyp, $4,8 mlrd-qa jetti. Bıylǵy qańtar-sáýir aılarynda ekijaqty taýar aınalymy $1,9 mlrd-ty qurady, bul ótken jyldyń sáıkes kezeńindegi kórsetkishten 42,1%-ǵa artyq.
Kezdesýde saýda-ekonomıkalyq baılanystardy damytý, ónerkásip kooperatsııasyn keńeıtý, kólik-logıstıka salasyndaǵy ózara yqpaldastyqty nyǵaıtý, sondaı-aq energetıka, sý resýrstary jáne týrızm salalaryndaǵy yntymaqtastyq máselelerine nazar aýdaryldy.
Forým jumysyna Ózbekstan men Albanııa prezıdentteri, Ázerbaıjan, Belarýs, Qyrǵyzstan, Reseı Federatsııasy jáne Tájikstan úkimetteriniń basshylary, sondaı-aq bıznes, halyqaralyq damý bankteri men memlekettik organdardyń ókilderi qatysty. Іs-shara barysynda turaqty ekonomıkalyq damý, ınvestıtsııalar tartý jáne ınnovatsııalar engizý máseleleri talqylandy.
Forýmda sóz sóılegen Oljas Bektenov Qazaqstan Ortalyq Azııanyń ekonomıkalyq áleýetin ashý maqsatynda óńir elderi arasyndaǵy ózara is-qımyldy odan ári tereńdetýdi qoldaıtynyn atap ótti.
Qazaqstanda Prezıdent Qasym-Jomart Toqaevtyń bastamasymen júzege asyrylyp jatqan ınstıtýtsıonaldyq reformalar ornyqty ártaraptandyrylǵan ekonomıkalyq ósimdi qamtamasyz etýge baǵyttalǵan. Investıtsııalyq ahýaldy jaqsartýǵa jáne iskerlik belsendilikti arttyrýǵa erekshe nazar aýdarylýda. Qazaqstan Respýblıkasynyń jańa Konstıtýtsııasynda ádiletti ári qýatty memleket qurýdyń berik negizi qalanyp, bul elimizdegi iskerlik ortany odan ári jetildirýge jáne ınvestıtsııalyq tartymdylyqty arttyrýǵa qosymsha múmkindik jasaıdy.
Qazirgi tańda 2030 jylǵa deıingi ınvestıtsııalyq saıasat tujyrymdamasy jańartyldy. Sheteldik kapıtal tartý kólemin keńeıtý úshin Kazakh Invest ulttyq kompanııasynyń basym naryqtarǵa qatysýy kúsheıtilýde. Bas prokýratýra janyndaǵy Investorlardyń quqyqtaryn qorǵaý komıteti bıznestiń zańdy múddeleriniń qorǵalýyn qamtamasyz etedi. Investorlar men joǵary bilikti mamandar úshin elde bolý sharttaryn jeńildetýdi kózdeıtin «Altyn Visa» jańa arnaıy vızalyq rejımi engizilýde. Birlesip qabyldanǵan bul sharalar ınvestıtsııalyq belsendilikti yntalandyrýǵa jáne Qazaqstandaǵy joǵary tehnologııaly jańa salalardyń damýyn jedeldetýge baǵyttalǵan.
QR Premer-mınıstri tsıfrlyq tehnologııalar men JI salasyndaǵy yntymaqtastyqtyń áleýetin atap ótti. Qazaqstan jańa býynnyń IT-ekojúıesin belsendi qalyptastyrýda: eki sýperkompıýter paıdalanýǵa berildi, Alem.ai halyqaralyq jasandy ıntellekt ortalyǵy quryldy. Ortalyq Azııadaǵy tsıfrlyq habqa aınalýǵa baǵyttalǵan «DÓO alqaby» jobasy júzege asyrylýda. Jobany damytýǵa álemdik IT alpaýyttary – Firebird jáne NVIDIA qazirdiń ózinde $10 mlrd kóleminde ınvestıtsııa salyp otyr.
Aıta keteıik, Qazaqstan men IT-alpaýyttary JI salasynda $10 mlrd-tyq kelisimderge qol qoıdy.
