Oljas Bektenov: tarıhı qujattardy tsıfrlyq arhıvte saqtap, qoljetimdi etý kerek

ASTANA. KAZINFORM – «e-Arhıv» derekteri «Batyrlarǵa taǵzym» onlaın-platformasyna ornalastyrylady. Bul týraly Premer-mınıstr Oljas Bektenov málim etti.

- «e-Arhıv» aqparattyq júıesin odan ári damytýǵa basa nazar aýdarǵan jón. Ol qujattardyń saqtalýyn qamtamasyz etip, arhıv jumysynyń tıimdiligin arttyrady. «e-Arhıv» derekterin «Batyrlarǵa taǵzym» onlaın-platformasymen úılestirý jumystaryn aıaqtaý qajet. Qolymyzda bar tarıhı qujattardyń bárin ulttyq tsıfrlyq arhıv bazasynda saqtap, qoljetimdi etýimiz kerek, - dedi Oljas Bektenov Úkimet otyrysynda.

Odan ári Úkimet basshysy kitaphana salasyn jetildirý kerektigin aıtty.

- «E-kitaphana» júıesinde qazirdiń ózinde klassıkadan bastap zamanaýı basylymdarǵa deıingi kitaptardy oqýǵa múmkindik bar. Aldaǵy ýaqytta olardyń sanyn kóbeıtip, qoldanystaǵy platformalarmen belsendi jumys isteý kerek. Sonymen qatar qazir aýdıo-kitaptar óte tanymal. Qazaqstandyq avtorlardyń aýdıo-kitaptaryn jasap, olardy túrli platformalarǵa, onyń ishinde ártúrli tilderde de ornalastyrý qajet. Osylaısha ádebıetimizdi elimizde ǵana emes, odan tys jerlerde de nasıhattaı alamyz, - deıdi ol.

Buǵan deıin Oljas Bektenov fılmnen túsetin paıdanyń kóbi kınoteatr ıelerinde qalyp jatqanyn aıtty. 

Aıta ketsek, byltyr otandyq kıno óndirisi 58 paıyzǵa artty. Premer-mınıstr kıno týyndylardyń sanyn kóbeıtip, tek paıda túsirýdi ǵana maqsat etpeı, fılmderdiń sapasyna basa nazar aýdarý kerektigin basa aıtty.