Oljas Bektenov tapsyrmalaryn durys oryndamaı otyrǵan óńirlerdi atady

ASTANA. KAZINFORM — Búgin Úkimet otyrysynda Premer-Mınıstr Oljas Bektenov órtke qarsy sharalardy baıaý júrgizip jatqan óńirlerdi atady.

Premer-Mınıstr mamyr aıyndaǵy Úkimet otyrysynda ákimdikterge órtke qarsy barlyq qajetti daıyndyq sharalaryn júrgizýdi tapsyrǵanyn eske saldy.

«Alaıda, keıbir oblystarda atalǵan jumys óz deńgeıinde júrgizilmeı otyr. Máselen, Abaı, Jetisý, Qaraǵandy, Qostanaı jáne Pavlodar oblystarynda sý kózderiniń túbin tereńdetý jumystary júrgizilgen joq. Qostanaı, Abaı jáne Ulytaý oblystarynda otyn qorymen qamtamasyz etý máseleleri tolyq sheshilmeı otyr. Qostanaı oblysynda órttiń aldyn alý jáne sóndirý jónindegi tıisti jedel shtab ýaqtyly qurylmaǵan. Aqmola, Atyraý, Soltústik Qazaqstan jáne Ulytaý oblystarynda órtke qarsy jer jyrtý jumystary baıaý júrip jatyr. Onsyz dala nemese orman órtterin aýyzdyqtaý qıyn bolady», — dedi Úkimet basshysy.

Onyń atap ótýinshe, Aqtóbe, Atyraý jáne Soltústik Qazaqstan oblystarynyń aýyldaryn qýraǵan ósimdikter men qoqystardan tazartý jumystary áli aıaqtalmaǵan.

«Óńir ákimderi osy máselelermen tikeleı aınalysýy qajet», — dedi Oljas Bektenov.