Oljas Bektenov «Taldyqorǵan – Úsharal» gaz qubyry qurylysynyń barysymen tanysty
TALDYQORǴAN. KAZINFORM – Qazaqstan Premer-Mınıstri Oljas Bektenov Jetisý oblysyna jumys sapary aıasynda Memleket basshysynyń tapsyrmasy boıynsha iske asyrylyp jatqan «Taldyqorǵan – Úsharal» magıstraldy gaz qubyry qurylysynyń barysymen tanysty. Bul týraly Úkimettiń baspasóz qyzmeti habarlady.
«Taldyqorǵan – Úsharal» magıstraldy gaz qubyrynyń jalpy uzyndyǵy 302,4 km quraıdy. Joba aıasynda alty gaz burý qubyry men avtomatty gaz taratý stansalaryn salý kózdelgen. Gaz qubyrynyń ótkizý múmkindigi – jylyna 385 mln m3 gaz. «QazaqGaz» UK» AQ basqarma tóraǵasy Sanjar Jarkeshov nysan «Almaty – Taldyqorǵan» magıstraldy gaz qubyrynyń qoldanystaǵy biryńǵaı júıesiniń quramynda paıdalanylatynyn, qurylysty aıaqtap, iske qosý 2026 jyldyń sońyna josparlanyp otyrǵanyn baıandady.
Jańa «Taldyqorǵan – Úsharal» magıstraldy gaz qubyry 124 myń turǵyny bar Aqsý, Sarqan, Alakól aýdandarynyń 66 eldi mekenin tabıǵı gazben qamtamasyz etedi. Qurylysy aıaqtalyp, iske qosylǵannan keıin oblysty gazdandyrý deńgeıi 90%-ǵa deıin ósedi.
Premer-Mınıstr jańa gaz qubyry óńirdegi turǵyn úılerdi, áleýmettik nysandar men ónerkásip kásiporyndaryn energetıkalyq qaýipsizdikpen jáne turaqty gazben qamtamasyz etetinin atap ótti. Bul óńirdiń turaqty damýyna jáne turmys sapasyn jaqsartýǵa yqpal etedi. Sondaı-aq iskerlik belsendiliktiń artýy, jańa jumys oryndaryn ashyp, shaǵyn jáne orta bıznestiń damýy qosymsha oń nátıje bermek.
Jalpy, Jetisý oblysynda 358 eldi mekenniń 192-si gazdandyrýǵa jatady, 37 eldi meken gazben qamtyldy, 334 myń adam (47,6%) gazǵa qol jetkizdi. Elimizde barlyǵy 2023 jyldyń qorytyndysy boıynsha halyqty gazben qamtý deńgeıi 60%-dy qurady (12 mln adamǵa gaz qoljetimdi).
«Memleket basshysy bastamashylyq etken aýqymdy ınfraqurylym jobalaryn iske asyrýǵa Úkimet erekshe mán beredi. Ekonomıka úshin basym jobalardy qarjylandyrýǵ «Samuryq-Qazyna» jáne «Báıterek» holdıngteriniń, ishki kapıtal naryǵynyń resýrstary men qarajaty, tikeleı sheteldik ınvestıtsııalar men jeke kapıtal belsendi túrde tartylýda. «Samuryq-Qazyna» qarajaty esebinen 42 gazben qamtý jobasyn iske asyrýǵa 10,4 mlrd teńge bólindi. Bul jyl sońyna deıin Jetisý oblysyndaǵy taǵy 30 eldi mekendi gazben jabdyqtaýǵa múmkindik beredi», — dep atap ótti Oljas Bektenov.
Úkimet basshysy jobalardy iske asyrý kezinde taýarlar men qyzmetterdegi qazaqstandyq qamtýdyńbarynsha joǵary úlesin qamtamasyz etý qajettigine toqtaldy.
Energetıka mınıstrligine jáne «QazaqGaz» ulttyq kompanııasyna, oblys ákimdigine belgilengen merzimderdi saqtaı otyryp, jobalardy sapaly iske asyrý úshin barlyq sharany qabyldaý tapsyryldy. Sonymen qatar jeke úılerge gazdyń qosylýyn baqylaýdy kúsheıtý tapsyryldy.
