Oljas Bektenov sý tasqynynyń jańa kezeńine daıyn bolýdy eskertti
ASTANA. KAZINFORM – Elimizdiń soltústik, ortalyq jáne shyǵys óńirlerinde sý tasqynynyń jańa belsendi kezeńi bastalady. Bul týraly Úkimet otyrysynda Premer-Mınıstr Oljas Bektenov aıtty.
«Qalyń qar men topyraqtyń toń bolyp qatyp qalýy, sondaı-aq kúnniń kúrt jylynýy men qatty jaýyn-shashynnyń saldary elimizdiń aýmaǵynda, ásirese batys óńirindegi eldi-mekenderde kólemdi sý tasqynyna alyp keldi. 1,5 myńǵa jýyq úı sý astynda qaldy. Baspanalar qırap, joldar buzyldy. Birqatar óńirlerde jergilikti aýqymdaǵy tótenshe jaǵdaı jarııalandy. Kórip otyrǵanymyzdaı, óńirler sý tasqynynyń naqty qaýpin jete baǵalaı almady. Biz jumysty barynsha kúsheıtýge tıispiz», - dedi Oljas Bektenov.
Osy oraıda ol Memleket basshysy keshegi keńes barysynda tasqyn qaýpi azaıdy deýge bolmaıtynyn atap ótkendigin eske saldy.
«Qazir aýa temperatýrasynyń birshama tómendeýine baılanysty tasqynnyń ekpini basylǵan sııaqty. Alaıda, aldaǵy kúnderi boljam boıynsha aýa raıy aıtarlyqtaı jylynady dep kútilýde. Demek, elimizdiń soltústik, ortalyq jáne shyǵys óńirlerinde sý tasqynynyń jańa belsendi kezeńi bastalady. Buǵan daıyn bolýymyz kerek», - dedi Úkimet basshysy.
