Oljas Bektenov: Sý tasqyny qaýpine qarsy barlyq qyzmet daıyn bolýy kerek
ASTANA. KAZINFORM — Oljas Bektenov aǵymdaǵy gıdrologııalyq jaǵdaı boıynsha jıyn ótkizdi, dep habarlaıdy Úkimettiń baspasóz qyzmeti.
Premer-mınıstr Oljas Bektenov tótenshe jaǵdaılar mınıstri Shyńǵys Árinovtiń, ekologııa jáne tabıǵı resýrstar mınıstri Erlan Nysanbaev pen ekologııa jáne tabıǵı resýrstar vıtse-mınıstri Nurlan Aldamjarovtyń, sondaı-aq birqatar óńir ákimderiniń qaýipti gıdrologııalyq qubylystarǵa baılanysty el aýmaǵyndaǵy ahýal týraly esepterin tyńdady.
TJM-nyń Respýblıkalyq jedel shtaby men óńirlik shtabtar táýlik boıy jumys istep jatyr.
Almaty qalasy men Almaty oblysynyń aýmaǵyndaǵy jaǵdaıǵa qatysty tótenshe jaǵdaılar mınıstri Shyńǵys Árinov táýlik boıy jumys isteıtin 12 sý beketi qoıylǵanyn baıandady. Aqsaı bógetinde qorǵanysh úıindisin ulǵaıtý, qurylysty ınertti materıaldarmen nyǵaıtý jumystary jáne úzdiksiz baqylaý júrgizilip jatyr. Qarasaı aýdany Jańaturmys aýylyndaǵy jaǵdaı qadaǵalaýda. Barlyq apattyq-qalpyna keltirý jumystary uıymdastyrylǵan, jaǵalaýdy nyǵaıtý jáne ózen arnalaryn tazartý jumystary júrgizilip keledi. «Qazseldenqorǵaý» beketteri turaqty monıtorıng pen baqylaýdy qamtamasyz etip otyr. Qazirgi ýaqytta sý deńgeıi qalypty jaǵdaıda.
Mańǵystaý oblysynda Tótenshe jaǵdaılar mınıstrligi ákimdikpen birlesip, sý aıdaý jáne sý basý saldaryn joıý jumystary jalǵasyp keledi. Qajetti kúshter men quraldar jedel jaǵdaıdyń kez kelgen ózgerisine jedel den qoıýǵa daıyn. Jalpy alǵanda, sý tasqyny qaýpi joǵary barlyq óńirde Tótenshe jaǵdaılar mınıstrliginiń kúshteri men quraldarynyń, onyń ishinde avıatsııany toptastyrý aldyn ala kúsheıtildi. Qutqarý bólimsheleriniń, ınjenerlik jáne apattyq-qutqarý tehnıkalarynyń kezekshiligi uıymdastyryldy.
Qazgıdromettiń málimetinshe, aldaǵy kúnderi elimizdiń barlyq aýmaǵynda jaýyn-shashyn mol bolady dep boljanyp otyr. Almaty, Jambyl jáne Jetisý oblystarynda nóser jańbyr jaýady dep kútiledi.
Osyǵan baılanysty Premer-mınıstr Oljas Bektenov birqatar tapsyrma berdi:
- óńir ákimdikteri TJM-men birlesip, adamdardyń qaýipsizdigin jáne eldi mekenderdiń ınfraqurylymyn qamtamasyz etý jóninde tıisti sharalar qabyldasyn;
- jergilikti atqarýshy organdardyń kúshteri men quraldarynyń daıyndyǵyn qamtamasyz etý, onyń ishinde evakýatsııalaý pýnktterin, qajetti kólikti daıyndaý jáne halyqty evakýatsııalaý jaǵdaılaryna den qoıý josparlaryn jańartý;
- sel qaýpi bar óńirlerdiń ákimdikteri muzdaq kólderdiń jaı-kúıin erekshe baqylaýda ustasyn, onyń ishinde olardyń ýaqtyly bosatylýyn qamtamasyz etsin, sondaı-aq seldi saqtaıtyn qurylystardyń daıyndyǵyn teksersin;
- Ekologııa mınıstrligine gıdrobeketterde kúndelikti baqylaý júrgizýdi jáne aýa raıy boljamyna turaqty monıtorıng jasaýdy qamtamasyz etý, aýa raıy nasharlaǵan jaǵdaıda daýyldy eskertýlerdi múddeli memlekettik organdarǵa jedel jetkizý.
- Sý resýrstary mınıstrligine gıdrotehnıkalyq qurylystardyń jaı-kúıin turaqty baqylaýda ustaý, transshekaralyq ózenderdegi sý shyǵyny men týyndaýy múmkin qaýipter týraly aqparatpen úzdiksiz ózara almasýdy uıymdastyrý.
- Tótenshe jaǵdaılar mınıstrligine qolaısyz gıdrologııalyq qubylystar jaǵdaıynda qaýipsizdikti qamtamasyz etý boıynsha aldyn alý jumystaryn jalǵastyrý.
— Almaty, Mańǵystaý oblystarynyń jáne Almaty qalasynyń ákimdikterine qalyptasyp otyrǵan jaǵdaıdy erekshe baqylaýda ustasyn. Tótenshe jaǵdaılardyń saldaryn joıý boıynsha jedel sharalar qabyldasyn, — dep atap ótti Oljas Bektenov.
Buǵan deıin Almaty oblysynda karer topyraǵy opyrylyp, turǵyndar úıinen kóshirilip, keıinnen tótenshe jaǵdaı jarııalanǵanyn jazǵan edik.
